काठमाडौं (हाम्रो खेलकुद) – विश्वभर फैलिएको कोरोना भाइरसको कारण आइसिसि विश्वकप लिग-२ अन्तर्गत सातौं चरणमा नामिबियामा हुने नेपाल, स्कटल्याण्ड र नामिबियाबीचको एकदिवसिय त्रिकोणात्मक सिरिज सर्ने सम्भावना बढेको छ ।

नेपाल क्रिकेट संघ (क्यान) का सचिव अशोकनाथ प्याकुरेलले यस विषयमा आइसिसिले एक दुई दिनमा निर्णय दिने बताएका छन् । ‘पक्कै पनि सर्छनै होला । अहिलेसम्म त्यहिनै छ । स्कटल्यान्डले पनि सार्ने कुरा गरेको छ र यस विषयमा आइसिसिले १-२ दिनमा आधिकारीक निर्णय दिएपछि हामीले जानकारी दिनेछौं’, प्याकुरेलले हाम्रो खेलकुदसँग भने ।

आईसीसी विश्वकप लिग-२ अन्तर्गत नामिबिया, नेपाल र स्कटल्याण्डबीच त्रिकोणात्मक सिरिज वैशाख ८ देखि १५ गते सम्म हुने तालिका छ । यद्यपि कोरोना भाइरसको कारण विश्वभर क्रिकेटसहित लगभग सबै खेलकुदका गतिविधि ठप्प भएको छ ।

त्यस्तै एसीसी इस्टर्न रिजन छनोटमा नेपाल खराब गर्दै बाहिरिएपछि कप्तान ज्ञानेन्द्र मल्लको कप्तानी परिवर्तनको चर्चा छ । यस विषयमा प्याकुरेलले भने, ‘एक प्रतियोगिता हेरेको भरमा मात्र नेतृत्व परिवर्तन गर्नुपर्छ भन्ने होइन । टोलीलाई नयाँ उचाइमा पुर्याउन हामीले समिक्षा बैठक गर्दैछौं । जसमा कप्तानीदेखि सबै पक्षमा छलफल हुनेछ, ‘उनले भने ।

कुल ७ राष्ट्र सहभागि आईसीसी विश्वकप लिग–२ सन् २०२२ जनवरी सम्म चल्ने छ । जसमा शीर्ष तीन टोली त्यसैवर्ष हुने एक दिवसिय विश्वकप ग्लोबल क्वालिफायरमा स्थान बनाउने छन् भने चार टोलीले क्वालिफायर खेल्नुपर्ने हुन्छ । लिग-२ प्रतियोगिता अवधिमा एक टोलीले कुल ३६ ओडीआई खेल्ने छन् । नेपालले अघिल्लो महिना घरेलु मैदानमा ओमान र अमेरिकासँग विश्वकप लिग २ को सुरुवात गरेको थियो । जसमा ओमानसँग दुवै  खेलमा पराजित हुँदा अमेरिकालाई दुवै खेलमा पराजित गरेको थियो ।