एजेन्सी – विश्वभर महामरीको रुप लिएको कोरोना भाइरस (कोभिड १९) को कारण अन्तर्राष्ट्रिय जगतमा खेलकुदका सम्पूर्ण गतिविधी ठप्प छन् । अब खेलकुदका गतिविधी कहिले देखी सुरचारु हुन्छ भन्न सकिने अवस्था छैन ।

वैशाखमा हुने भनिएको १३ औं संस्करणको इन्डियन प्रिमियर लिग (आइपिएल) कोरोनाकै कारण अनिश्चित भएको छ । भारतीय क्रिकेट कन्ट्रोल बोर्ड (बिसिसिआई) ले हालसम्म कुनै आधिकारीक सुचना सार्वजनिक गरेको छैन । बिसिसिआईका एक सदस्यले ‘टाइम्स अफ इन्डिया’लाई आइपिएल आगमी अक्टोबर-नोभेम्बरमा हुन सक्ने बताएका छन् ।

अष्ट्रेलियामा अक्टोबर १८ देखि नोभेम्बर १५ सम्म टि२० विश्वकप हुँदैछ । उक्त विश्वकप स्थगित भएको खण्डमा आइपिएल अक्टोबर नोभेम्बरमा हुन सक्ने बिसिसिआईका एक सदस्यले बताएको ‘टाइम्स अफ इन्डिया’ले जनाएको छ । ‘यो समय सिमा भन्ने अवस्था छैन । अहिले अष्ट्रेलियाले पनि ६ महिनाको लागि बन्द गरेको छ । जसले आइपिएल आयोजनाको लागि अक्टोबर नोभेम्बर सुरक्षित समय देखिन्छ । तर उक्त समयमा टि२० विश्वकप छ । अहिलेको अवस्था देखेर आइसिसिले विश्वकप स्थगित गरेमा उक्त समयमा आइपिएल गर्ने बारे सोच्न सकिन्छ’, बिसिसिआई स्रोतले भनेका छन् ।

सन् २०२१ मा भारतमा टि२० विश्वकपसँगै कार्यतालिका निकै व्यस्त हुँदा विश्वकप यो वर्ष स्थगित हुँदा २०२२ मा गर्नुपर्ने हुन्छ । त्यसैले पनि विश्वकप स्थगितको सम्भावना कम छ । विश्वकपको विषयमा आइसिसीले कुनै सुचना सार्वजनिक गरेको छैन । १३ औं संस्करण आइपिएल सुरुवातमा चैत्र १६ देखि सुरु हुने कार्यतालिका थियो । तर कोरोना भाइरसको कारण बिसिसिआईले उक्त मिती सार्दै वैशाख ३ देखी हुने बताएको थियो ।

भारतमा कोरोना भाइरसको संक्रमित दिनप्रतिदिन बढ्दै गएपछि वैशाख २ सम्मका लागि लकडाउन लगाइएको छ । उक्त लकडाउनको समय अझै बढ्न सक्ने सम्भावना छ । मनसुनको कारण भदौसम्म प्रतियोगिता गर्न मिल्दैन । त्यसपछि विश्वकप रहेको हुँदा यो वर्ष आइपिएल हुने सम्भावना न्युन छ ।

यता बिसिसिआईले आइपिएलको समय घटाउँदै गर्न सक्ने चर्चा पनि छ । सम्भवत एक राउन्ड मात्र लिग गर्ने विकल्प अगाडी आएको छ । तर अहिलेको अवस्थामा त्यो सम्भावना पनि देखिदैन । बुधबार सम्म भारतमा कोरोना भाइरसबाट ३८ जनाको मृत्यु भई सकेको छ भने १६ सय ३७ जनामा कोरोना संक्रमित छन् ।