दाङ (हाम्रो खेलकुद) – पुस दोस्रो साता देखि सुरु हुने महिला प्रधानमन्त्री राष्ट्रिय क्रिकेट प्रतियोगिताको लागि लमही क्रिकेट मैदानको तयारी अन्तिम चरणमा पुगेको छ । महिला राष्ट्रिय प्रतियोगिता लमहीका तीन वटा पिचमा सञ्चालन हुने छ ।

गतवर्ष आठौं राष्ट्रिय प्रतियोगितामा लमहीको पिचलाई लिएर प्रश्न उठेको थियो । यस पटक नेपाल क्रिकेट संघ (क्यान) ले काठमाडौंबाट मंसिर अन्त्यतिर क्यूरेटर बिशन मण्डललाई लमही पठाएको छ । जसले पिचमा सुधार हुने आशा गरिएको छ । ‘पिच बनाई रहेका छौं । माटो हालेको एक हप्ताभन्दा बढी भएको छ । हामीलाई घामले साथ दिन पर्यो । घामले साथ दिएमा पिच राम्रो बन्ने छ’, मण्डलले भने ।

आठौं राष्ट्रिय प्रतियोगितामा भन्दा यस पटक ब्याटिङ गर्न सजिलो हुने मण्डल बताउँछन् । ‘त्यसबेला खैरो माटो थियो । यस पटक खैरोमा रातो माटो मिलाएका छौं । पहिला भन्दा यस पटक विकेट राम्रो हुन्छ भन्ने आशा छ’, उनले भने । मैदानको ३० याडलाई विशेष ध्यान दिइएको छ । आउटफिल्डमा रहेका खाल्डा खुल्डीमा माटो हालिएको छ । प्रतियोगिताको लागि मैदान निर्माणको जिम्मा दाङ देउखुरी क्रिकेट क्लबले पाएको छ । पाको माटो हाल्न सुरु भई सकेको छ । खाल्डा खुल्डी पुर्ने काम जारी छ । रोलर लगाउने काम जारी छ ।

२५ सय समर्थक अट्ने प्याराफिटको काम पनि भई राखेको छ । प्याराफिट भने महिला प्रतियोगिता सम्म तयार हुने छैन । आगमी फागुन सम्म प्याराफिट तयार हुने बताइएको छ । नगरविकास समितिले प्याराफिट निर्माणको लागि १ करोड विनियोजन गर्दै ठेक्का दिएको थियो । लमही मैदान तयार पार्नको लागि दैनिक १२ जनशक्ति परिचालन भई रहेको छ । यसको खर्च पनि नगरविकास समितिलेनै ब्योहोर्ने छ ।

देउखुरी क्रिकेट क्लबका प्रशिक्षक तथा स्थानिय आयोजक व्यवस्थापन समितिका सदस्य अमित तामाङले विकेट बाहेक अन्य सबैकुरा काम सकि सकेको बताउँछन् । तामाङका अनुसार महिला राष्ट्रिय प्रतियोगिता तयारी अन्तिम चरणमा पुगेको छ । महिला प्रतियोगिता पछि मैदानमा नयाँ माटो हाल्न नगरविकास समितिले बजेट बिनियोजन गरेको छ ।

क्यानले पुष ११ गतेदेखि महिला प्रधानमन्त्री कप सुरु हुने बताएपनि एक हप्ता भन्दा कम समय बाँकी रहँदा खेल तालिका भने सार्वजनिक भएको छैन । लुम्बिनी प्रदेशले नेरी थापा मगरको कप्तानीमा टोली घोषणा गरि सकेको छ । प्रदेश दुई र एक को महिला प्रदेश छनोट सम्पन्न भई सकेको छ । सुदूरपश्चिम प्रदेशको छनोट जारी छ ।

गण्डकी र बागमतीले भने अझैं महिला छनोट सुरु गरेका छैनन् । एपिएफ पनि आफ्नो तयारी गरि रहेको छ । प्रतियोगितामा कर्णाली बाहेक अन्य ६ प्रदेश र एपिएफ गरि ७ टोलीबीच प्रतिस्पर्धा हुने छ । प्रतियोगिता समूहमा विभाजन गरेर हुन्छ वा सबै टोलीले लिगको आधारमा एक अर्कावीरुद्ध भिड्छन् हालसम्म स्पष्ट छैन । अर्कोतर्फ प्रदेश छनोट टि२० शैलीमा गरिएको छ । प्रतियोगिता एकदिवसिय वा टि२० भन्ने पनि अनिश्चित छ ।