एजेन्सी – ओपनर तथा विकेटकिपर जस बटलरले उत्कृष्ट ब्याटिङ गरेपछि इंग्ल्यान्डले तेस्रो टि२० खेलमा घरेलु टोली भारतलाई ८ विकेटले पराजित गरेको छ । योसँगै इंग्ल्यान्डले पाँच टि२० आई सिरिजमा २–१ को अग्रता लिएको छ ।

जितको लागि १ सय ५७ रनको विजयी लक्ष्य पछ्याएको इंग्ल्यान्डले १८.२ ओभरमा २ विकेट गुमाउँदै पूरा गर्यो । इंग्ल्यान्डलाई सहज जित दिलाउन जस बटलर ५२ बलमा ५ चौका र ४ छक्का सहित ८३ रनमा अविजित रहे । यो बटलरको टि२० आई करिअरको सर्वोत्कृष्ट प्रर्दशन हो । जोनी बेयरस्टो २८ बलमा ५ चौका सहित ४० रनमा अविजित रहे । तेस्रो विकेटका लागि बटलर र बेयरस्टोले ७७ रनको अविजित साझेदारी गर्दै सहज जित दिलाए । बेयरस्टोलेले शार्दूल ठाकुरलाई लगातार दुई चौका प्रहार गर्दै खेल जिताएका थिए । ओपनर जेसन रोय ९ र डेविड मलान १८ रनमा आउट भए । भारतका स्पिनर युजभेन्द्र चहल र वासिन्टन सुन्दरले १–१ विकेट लिए ।

त्यसअघि नरेन्द्र मोदी स्टेडियम अहमदाबादमा टस हारेर ब्याटिङको निम्तो पाएको भारतले निर्धारित २० ओभरमा ६ विकेट गुमाउँदै १ सय ५६ रन बनाएको थियो । कप्तान विराट कोहली ४६ बलमा ८ चौका र ४ छक्का सहित ७७ रनमा अविजित रहे पनि जितको लागि पर्याप्त भएन । कोहलीको यो लगातार दोस्रो अर्धशतक हो । दोस्रो खेलमा कोहलीले ७३ रनको विजयी इनिङ खेलेका थिए । हार्दिक पान्ड्या १५ बलमा २ छक्का सहित १७ रनमा आउट भए । छैटौं विकेटका लागि विराट र हार्दिकले ३५ बलमा ७० रनको उत्कृष्ट साझेदारी गरेका थिए ।

सुरुवाती दुबै खेलमा खराब प्रर्दशन गरेका ओपनर लोकेश राहुल (केएल) तेस्रो खेलमा पनि शून्यमा आउट भए । तेस्रो ओभरको तेस्रो बलमा तीव्र गतिका बलर मार्क वुडले राहुललाई शून्यमा बोल्ड आउट गरे । राहुल पहिलो खेलमा एक र दोस्रो खेलमा शून्यमा आउट भएका थिए । पाँचौं ओभरको चौथो बलमा रोहित शर्मालाई वुडलेनै जोफ्रा आर्चरबाट १५ रनमा क्याच गराउँदै इंग्ल्यान्डलाई राम्रो सुरुवात दिलाए । रोहितले १७ बलमा २ चौका प्रहार गरे ।

छैटौं ओभरको दोस्रो बलमा युवा ब्याट्सम्यान ईशान किशनलाई क्रिस जोर्डनले विकेटकिपर जस बटलरबाट ४ रनमा क्याच आउट गराए । ऋषभ पन्त १२ औं ओभरको पहिलो बलमा २५ रनमा रन आउट हुन पुगेपछि भारत दबाबमा परेको थियो । पन्तले २० बलमा ३ चौका प्रहार गरे । १५ औं ओभरको तेस्रो बलमा मार्क वुडले श्रेयस ऐरलाई डेविड मलानबाट ९ रनमा क्याच आउट गराएपछि भारत ८६–५ को कमजोर अवस्थामा पुगेको थियो । तर कोहली र हार्दिकले उत्कृष्ट साझेदारी गर्दै इनिङ उकासे ।

इंग्ल्यान्डका तीव्र गतिका बलर मार्कवुडले ४ ओभरमा ३१ रन खर्चेर ३ विकेट लिए । क्रिस जोर्डनले ४ ओभरमा १ मेडन सहित ३५ रन खर्चेर २ विकेट लिए ।

पहिलो खेलमा इंग्ल्यान्ड ८ विकेटले विजयी हुँदा दोस्रो खेलमा ७ विकेटले पराजित भएको थियो । चौथो खेल बिहिबार हुने छ ।