एजेन्सी – भारत र इंग्ल्यान्डबीचको चौथो टि२० आई खेल आज हुँदै छ । खेल बेलुका ७:१५ नरेन्द्र मोदी स्टेडियम अहमदाबादमा सुरु हुने छ । पाँच टि२० आई सिरिजमा इंग्ल्यान्डले २–१ को अग्रता लिएको छ ।

पहिलो खेलमा इंग्ल्यान्ड ८ विकेटले विजयी भएको थियो । दोस्रो टि२० आई ७ विकेटले पराजित भएको इंग्ल्यान्डले तेस्रो टि२० खेलमा ८ विकेटले विजयी हुँदै सिरिजमा अग्रता लिएको थियो । इंग्ल्यान्ड चौथो खेलमा जितका साथ सिरिज एक खेल अगावै जित्ने सोचमा हुने छ । यता भारत चौथो खेलमा जित निकाल्दै सिरिज बराबरी बनाउन खोज्ने छ ।

भारतका कप्तान विराट कोहली राम्रो लयमा छन् । कोहलीले दोस्रो टि२० खेलमा ७३ र चौथो खेलमा ७७ रनको अविजित इनिङ खेलेका थिए । विराटको लयलाई रोक्न इंग्ल्यान्डका बलरलाई प्रमुख चुनौती हुने छ । विराटले उत्कृष्ट प्रर्दशन गर्दा टोलीका प्रमुख ओपनर लोकेश राहुलको भने सुरुवाती तीन खेलमा प्रर्दशन खराब छ । पहिलो खेलमा एक रनमा आउट भएका राहुलले दोस्रो र तेस्रो खेलमा खाता खोल्न सकेनन् । भारतले राहुलमाथि विश्वास गर्दै आजको खेलमा पनि मौका दिन सक्छ ।

भारतको यस सिरिजको मुख्य उदेश्य आगमी अक्टोबर नोभेम्बरमा घरेलु मैदानमा हुने टि२० विश्वकपको तयारी हुने छ । त्यसैले भारत सिरिजको नतिजा भन्दा विश्वकप केन्द्रित हुने छ । राहुलले पछिल्लो दुई वर्षमा लगातार उत्कृष्ट प्रर्दशन गर्दै आएका थिए । टि२० आई वरियतामा चौथो स्थानमा रहेका राहुलको खराब लयले भारतलाई चिन्ता थपेको छ । चौथो खेलमा राहुललाई मौका दिने वा नदिनेमा कोहलीलाई पनि निर्णय लिन कठिन पर्ने देखिन्छ । कप्तान विराट कोहलीले आफ्नो प्रमुख रोजाईको ओपनर रहेको बताउँदै आएका छन् ।

राहुललाई बेन्चमा राखेको खण्डमा सूर्यकुमार यादवले मौका पाउने छन् । राहुल बेन्चमा बस्दा रोहित र ईशान किशनले ओपनिङ गर्ने छन् । दोस्रो खेलमा डेब्यूमै अर्धशतक बनाउँदै ईशान प्लेयर अफ द म्याच चुनिएका थिए । तेस्रो खेलमा ४ रनमा आउट भएका थिए । सूर्यलाई भने तेस्रो खेलमा बेन्चमा राखेको थियो । दोस्रो डेब्यू गरेपनि ब्याटिङ गर्ने मौका पाएनन् । भारतका तीव्र गतिका बलर भुवनेश्वर कुमार र शार्दूल ठाकुर तेस्रो खेलमा विकेट विहिन बनेका थिए ।

यी दुई तीव्र गतिका बलरलाई उत्कृष्ट प्रर्दशन गर्न आवश्यक देखिन्छ । स्पिनर वासिन्टन सुन्दर र युजभेन्द्र चहलले लगातार राम्रो प्रर्दशन गर्दै आएका छन् । तेस्रो खेलमा इंग्ल्यान्डका ओपनर तथा विकेटकिपर जस बटलरले ८३ रनको उत्कृष्ट विजयी इनिङ खेलेका थिए । सुरुवाती दुबै खेलमा राम्रो प्रर्दशन गर्न नसकेपनि तेस्रो खेलमा उत्कृष्ट इनिङ खेल्दै लयमा फर्किएको संकेत दिएका छन् । जेयस रोय राम्रो लयमा छन् । डेविड मलानलाई ठूलो इनिङ खेल्न आवश्यक छ ।

कप्तान ओईन मोर्गन, जोनी बेयरस्टो, बेन स्टोक्स र साम करण टोलीमा हुँदा ब्याटिङमा बलियो र गहिराई छ । तेस्रो खेलमा दुबै ओपनरलाई आउट गरेका तीव्र गतिका बलर मार्कवुड भारतलाई टाउको दुखाई बन्न सक्छन् । उनले तेस्रो खेलमा तीन विकेट लिएका थिए । तीव्र गतिका बलर जोफ्रा आर्चर अर्का प्रमुख हतियार हुन् । क्रिस जोर्डन, साम करण र बेन स्टोक्सले हुँदा इंग्ल्यान्डको तीव्र गतिको बलिङ युनिट उत्कृष्ट छ । सुरुवाती तीन खेलमा टस जित्ने टोली विजयी भएका छन् । त्यसैले चौथो खेलमा टस निकै महत्वपूर्ण हुने छ ।