एजेन्सी – भारतीय क्रिकेट कन्ट्रोल बोर्ड (बिसिसिआई) ले इंग्ल्यान्डविरुद्ध खेल्ने तीन ओडिआई सिरिजको लागि दुई नयाँ अनुहार समेट्दै टोली घोषणा गरेको छ ।

ब्याट्सम्यान सूय कुमार यादव र तीव्र गतिका बलर प्रसिद्ध कृष्णालाई पहिलो पटक ओडिआई टोलीमा समेट्दै भारतले विराट कोहलीको कप्तानीमा १८ सदस्य टोली घोषणा गरेको छ । भारत र इंग्ल्यान्डबीच पाँच टि२० आई सिरिज जारी छ । सुरुवाती ४ खेल सकिँदा सिरिज २–२ को बराबरीमा छ । पाँचौं टि२० आई खेल शनिबार हुने छ । टि२० आई पछि ओडिआई सिरिज हुने छ ।

पहिलो ओडिआई पहिलो खेल चैत १०, दोस्रो १३ र तेस्रो ओडिआई १५ गर्ते (मार्च २३, २६ र २८) हुने छ । तीनै ओडिआई खेल पुणेमा हुने छ । सूर्यले भारतका लागि इंग्ल्यान्डसँगको दोस्रो टि२० आई खेलमा डेब्यू गरेका थिए । उक्त खेलमा ब्याटिङ गर्न नपाएपनि विहिबार चौथो खेलमा भारतलाई जिताउन सूर्यले डेब्यू इनिङमा ५७ रनको उत्कृष्ट प्रर्दशन गरेपछि छनोट समितिले ओडिआई टोलीमा पनि मौका दिने निर्णय लिएको हो । भारतीय टोलीबाट खेल्नु अघि मुम्बईबाट सूर्यले विजय हजारे ट्रफीमा उच्च प्रर्दशन गरेका थिए । सूर्यले इन्डियन प्रिमियर लिग (आइपिएल) मुम्बई इन्डियन्स र प्रसिद्धले कोलकाता नाइट राइडर्सबाट आइपिएल खेल्ने गर्दछन् ।

तीव्र गतिका बलर प्रसिद्ध कृष्णले हालसम्म भारतीय टोलीबाट खेलेका छैनन् । उनी पहिलो पटक भारतीय टोलीमा परेका हुन् । सूर्यले घरेलु क्रिकेट मुम्बई र प्रसिद्धले कर्नाटकाबाट खेल्ने गर्दछन् । कृष्णाले यसै साता सम्पन्न विजय हजारे ट्रफीमा उत्कृष्ट प्रर्दश गरेपछि भारतीय छनोट समितिले उनलाई भारतीय टोलीमा बोलाएको हो । उनले विजय हजारेमा कर्नाटकालाई फाइनल सम्म पुर्याउन ७ खेलमा १४ विकेट लिएका थिए । त्यस्तै घरेलु क्रिकेटमा उत्कृष्ट प्रर्दशन गर्दै क्रुनाल पान्ड्याले भारतीय टोलीमा पूनरागमन गरेका छन् ।

भारतको टोली : विराट कोहली (कप्तान), रोहित शर्मा (उपकप्तान), शिखर धवन, शुभमन गिल, श्रेयस ऐर, सूर्यकुमार यादव, हार्दिक पान्ड्या, ऋषभ पन्त (विकेकिपर), लोकेश राहुल (विकेटकिपर), युजभेन्द्र चहल, कुलदीप यादव, क्रुनाल पान्ड्या, वासिन्टन सुन्दर, टि नटराजन, भुवनेश्वर कुमार, मोहम्मद सिराज, प्रसिद्ध कृष्ण र शार्दूल ठाकुर ।