एजेन्सी – इंग्ल्यान्डका बायाँ हाते शीर्षक्रमका ब्याट्सम्यान डेविड मलानले टि२० आई क्रिकेटमा नयाँ विश्व कीर्तिमान बनाएका छन् । इंग्ल्यान्डबाट भारतविरुद्ध पाँचौं टि२० खेलको क्रममा शनिवार राती ६८ रन बनाउने क्रममा मलानले नयाँ कीर्तिमान कायम गरेका थिए ।

मलान टि२० आई क्रिकेटमा सर्वाधिक छिटो एक हजार रन पूरा गर्ने विश्वका ब्याट्सम्यान बनेका छन् । मलानले यस सफलता मात्र २४ इनिङमा हात पारेका हुन् । यसअघि टि२० आईमा सर्वाधिक छिटो एक हजार रन पूरा गर्ने कीर्तिमान पाकिस्तानका कप्तान बाबर आजमको नाममा थियो । बाबरले २६ इनिङमा यस सफलता हात पारेका थिए । भारतीय क्रिकेट टोलीका कप्तान विराट कोहलीले २७, अष्ट्रेलिया कप्तान आरोन फिन्च र भारतीय ब्याट्सम्यान लोकेश राहुलले २९–२९ इनिङमा टि२० आईमा एक हजार रन पूरा गरेका थिए ।

अन्तिम खेलमा इंग्ल्यान्ड भारतसँग ३६ रनले पराजित हुँदै पाँच टि२० आई सिरिज ३–२ ले गुमाउन पुग्यो । पाँच टि२० आई सिरिजमा मलानले १ सय ४८ रन बनाए । ३३ वर्षिय मलानले टि२० आईमा २०१७ मा डेब्यू गरेका थिए । मलानले २४ खेलमा १ शतक र १० अर्धशतक सहित एक हजार ३ रन बनाई सकेका छन् । उत्कृष्ट प्रर्दशन १ सय ३ रन अविजित छ । मलानले अप्रिल ९ देखि सुरु हुने इन्डियन प्रिमियर लिग (आइपिएल) पन्जाब किंग्सबाट खेल्ने छन् ।