काठमाडौं (हाम्रो खेलकुद) – ललितपुर महानगरपालिकाको आर्थिक सहयोगमा नेपाल क्रिकेट संघ (क्यान) ले आयोजना गर्न लागेको ललितपुर मेयर वुमन्स च्याम्पियनसिप–२०७७ को विजेताले ३ लाख रुपैयाँ प्राप्त गर्ने भएका छन् ।

ललितपुर महानगरपालिकाले एक पत्रकार सम्मलेन गर्दै पुरस्कार राशी र खेल हुने मिति सार्वजनिक गरेको हो । विजेताले ३ लाख र उप विजेताले १ लाख ५० हजार प्राप्त गर्ने छन् । प्रतियोगिता सर्वोत्कृष्ट खेलाडीले २५ हजार, उत्कृष्ट ब्याटर र बलरले समान १५–१५ हजार प्राप्त गर्ने छन् । ‘प्लेयर अफ द म्याच’ ले ३ हजार प्राप्त गर्ने छन् । प्रतियोगिता चैत्र २१ देखि २८ गते सम्म टियु क्रिकेट मैदानमा हुनेछ ।

मेयर कप आयोजना गर्न क्यानलाई ललितपुरले २० लाख रुपैयाँ प्राप्त गर्ने छ। ललितपुर मेयर कप ५ टोली हुने छन् । प्रतियोगितामा गत पुषमा दाङको लमहीमा सम्पन्न प्रधानमन्त्री राष्ट्रिय महिला टि२० क्रिकेट प्रतियोगिता सेमिफाइनलमा पुगेका चार टोलीहरु प्रदेश एक, नेपाल एपिएफ क्लब, सुदूरपश्चिम र लुम्बिनी प्रदेशसँगै ललितपुर महानगरको एउटा टोली बन्नेछ ।

ललितपुर मेयर ११ टोलीमा समूह चरणबाटै बाहिरिएका प्रदेश २, बागमती, गण्डकी र कर्णाली प्रदेशबाट खेल्दै उत्कृष्ट प्रर्दशन गर्ने खेलाडीहरु छनोट गरि टोली निर्माण हुने छ । पुषमा भएको प्रधानमन्त्री महिला कपको फाइनलमा विभागीय टोली एपिएफलाई ६ रनले हराउँदै प्रदेश नम्बर एक इतिहासमा पहिलो पटक राष्ट्रिय च्याम्पियन बनेको थियो ।