एजेन्सी – कप्तान टम लाथमको सानदार शतकको सहयोगमा न्युजिल्यान्डले दोस्रो ओडिआई खेलमा बंगलादेशलाई ५ विकेटले पराजित गर्दै एक खेल अगावै सिरिज जितेको छ । तीन ओडिआई सिरिजमा न्युजिल्यान्डले एक खेल अगावै २–० ले जितेको हो ।

जितको लागि २ सय ७२ रनको विजयी लक्ष्य पछ्याएको न्युजिल्यान्डले ४८.२ ओभरमा ५ विकेट गुमाउँदै पूरा गर्यो । नियमित कप्तान केन विलियम्सन चोटका कारण अनुपस्थीति हुँदा यस सिरिजमा कप्तानी गरि रहेका विकेटकिपर टम लाथमले १ सय ८ बलमा १० चौका सहित १ सय १० रनको अविजित उत्कृष्ट शतकीय विजयी इनिङ खेले । लाथमको यो ओडिआई करिअरको पाँचौं शतक हो । देभन कन्वे ९३ बलमा ७ चौका सहित ७२ रनमा रन आउट भए ।

एक सयम ५३–३ को कमजोर अवस्थामा पुगेको न्युजिल्यान्डलाई चौथो विकेटका लागि टम लाथम र देभन कन्वेले १ सय ४३ बलमा १ सय १३ रनको महत्वपूर्ण साझेदारी गरेका थिए । जेम्स निशम ३०, हेनरी निकोल्स १३ र मार्टिन गुप्टिल २० रनमा आउट भए । बंगलादेशका मेहदी हसन र मुस्ताफिजुर रहमानले २–२ विकेट लिए ।

त्यसअघि टस हारेर ब्याटिङ थालेको बंगलादेशले निर्धारित ५० ओभरमा ६ विकेट गुमाउँदै २ सय ७१ रन बनाएको थियो । बंगलादेशका कप्तान तमिम इकबालले १ सय ८ बलम ११ चौका सहित सर्वाधिक ७८ रन बनाए । मोहम्मद मिथुनले ५७ बलमा ६ चौका र २ छक्का सहित ७३ रनमा अविजित रहे । सौम्य सरकार ३२ र मुश्फिकुर रहिम ३४ रनमा आउट भए ।

न्युजिल्यान्डका मिचेल सान्टनारले सर्वाधिक २ विकेट लिए । काइल जामिसन, म्याट हेनरी र ट्रेन्ट बोल्टले १–१ विकेट लिए । पहिलो खेलमा न्युजिल्यान्ड ८ विकेटले विजयी भएको थियो । तेस्रो तथा अन्तिम खेल शुक्रबार हुने छ ।