एजेन्सी – इंग्ल्यान्डले भारतविरुद्ध तीन ओडिआई खेलको सिरिज अन्तर्गत तेस्रो तथा निर्णायक खेलमा पहिला बलिङ गर्ने भएको छ । महाराष्ट्र क्रिकेट एसोसिएसन स्टेडियम पुणेमा इंग्ल्यान्डका कप्तान जस बटलरले टस जितेर पहिला बलिङ गर्ने निर्णय लिएका हुन् ।

तीन ओडिआई सिरिजमा सुरुवाती दुई खेल सकिँदा १–१ को बराबरी अवस्थामा छ । भारत पहिलो खेलमा ६६ रनले विजयी हुँदा दोस्रो खेलमा ६ विकेटले पराजित भएको थियो । इंग्ल्यान्डले टोलीमा एक परिवर्तन गरेको छ । तीव्र गतिका बलर टम करणको स्थानमा मार्कवुडलाई मैदान उतारेको छ । भारतले टोलीमा एक परिवर्तन गरेको छ । स्पिनर कुलदीप यादवको स्थानमा तीव्र गतिका बलर टि नटराजनलाई मौका दिएको छ ।

इंग्ल्यान्डले दोस्रो ओडिआई जित्नेक्रममा ३ सय ३७ रनको विजयी लक्ष्य ४३.३ ओभरमा ४ विकेट गुमाउँदै सहजै पूरा गरेको थियो । जसक्रममा ओपनर जोनी बेयरस्टोले १ सय २४ र बेन स्टोक्सले ९९ रनको उत्कृष्ट इनिङ खेलेका थिए । पछिल्ला पाँच ओडिआईमा भारत ४ खेलमा पराजित हुँदा एक खेलमा विजयी भएको छ ।

इंग्ल्यान्डको प्लेइङ ११ : जेसन रोय, जोनी बेयरस्टो, लियाम लिभिङस्टोन, जस बटलर (विकेटकिपर/कप्तान) बेन स्टोक्स, डेविड मलान, मोईन अली, साम करण, मार्कवुड, आदिल राशिद र रिसी टोपली ।

भारतको प्लेइङ ११ : रोहित शर्मा, शिखर धवन, विराट कोहली (कप्तान), लोकेश राहुल ऋषभ पन्त(विकेटकिपर), हार्दिक पान्ड्या, क्रुनाल पान्ड्या, शार्दूल ठाकुर, भुवनेश्वर कुमार, टि नटराजन र प्रसिद्ध कृष्णा ।