एजेन्सी – ओपनर शिखर धवन, विकेटकिपर ऋषभ पन्त र अलराउन्डर हार्दिक पान्ड्याको अर्धशतकको सहयोगमा भारतले तेस्रो तथा निर्णायक ओडिआई खेलमा इंग्ल्यान्डलाई ३ सय ३० रनको बलियो लक्ष्य दिएको छ ।

महाराष्ट्र क्रिकेट एसोसियसन स्टेडियम पुणेमा टस हारेर ब्याटिङको निम्तो पाएको भारत ४८.२ ओभरमा ३ सय २९ रनमा अल आउट भयो । भारतका विकेटकिपर ऋषभ पन्तले सर्वाधिक ७८ रन बनाए ।

भारतलाई ओपनर शिखर धवन र रोहित शर्माले पहिलो विकेटका लागि १४.४ ओभरमा १ सय ३ रनको शतकीय साझेदारी गर्दै राम्रो सुरुवात दिलाएका थिए । स्पिनर आदिल राशिदले रोहितलाई ३७ रनमा बोल्ड आउट गर्दै इंग्ल्यान्डलाई पहिलो सफलता दिलाए । रोहितले ३७ बलमा ६ चौका प्रहार गरे ।

राशिदलेनै १७ औं ओभरको चौथो बलमा शिखरलाई ६७ रनमा कट एण्ड बोल्ड आउट इंग्ल्यान्डलाई दोस्रो सफलता दिलाएका थिए । शिखरले ५६ बलमा १० चौका प्रहार गरे । एक ओभरपछि अर्थात १८ औं ओभरको चौथो बलमा कप्तान विराट कोहलीलाई स्पिनर मोईन अलीले ७ रनमा बोल्ड आउट गरेपछि इंग्ल्यान्ड खेलमा फर्किने संकेत देखाएको थियो । पार्टटाइम स्पिनर लियाम लिभिङस्टोनले लोकेश राहुललाई ७ रनमा मोईन अलीबाट उत्कृष्ट क्याच आउट गराउँदा भारत १५७–४ को अवस्थामा पुगेको थियो । तर पाँचौं विकेटका लागि हार्दिक पान्ड्या र ऋषभ पन्तले ७३ बलमा ९९ रनको साझेदारी गर्दै भारतलाई बलियो अवस्थामा पुर्याएका थिए ।

३६ औं ओभरको अन्तिम बलमा साम करणले ऋषभ पन्तलाई जस बटलरबाट ७८ रनमा क्याच गराउँदै उक्त साझेदारी तोडेका थिए । ऋषभले ६२ बलमा ५ चौका र ४ छक्का प्रहार गरे । ३९ औं ओभरको अन्तिम बलमा बेन स्टोक्सले हार्दिक पान्ड्यालाई ६४ रनमा बोल्ड आउट गरे । हार्दिकले ४४ बलमा ५ चौका र ४ छक्का प्रहार गरे । तल्लोक्रमका शार्दूल ठाकुरले २१ बलमा १ चौका र ३ छक्का सहित ३० रन जोड्दै भारतलाई बलियो योगफलमा पुर्याए । कु्रनाल पान्ड्या २५ रनमा आउट भए । भारतले अन्तिम ४ विकेट ८ रन जोड्न गुमाएको थियो ।

स्पिनर आदिल राशिदले १० ओभरमा ८१ रन खर्चेर २ विकेट लिए । तीव्र गतिका बलर मार्कवुडले ७ ओभरमा १ मेडन सहित ३४ रन खर्चेर ३ विकेट लिए । स्पिनर मोईन अली, लियाम लिभिङस्टोन, मार्कवुड, साम करण, रिसी टोपली र बेन स्टोक्सले १–१ विकेट लिए ।