एजेन्सी – श्रीलंका अलराउन्डर थिसारा परेराले श्रीलंका मेजर क्लब लिमिटेड ओभर टुनामेन्टमा एकै ओभरमा ६ बलमा छक्का प्रहार गरेका छन् । आइतबार सम्पन्न लिष्ट ए खेलमा परेराले श्रीलंका आर्मी स्पोटर््स क्लबबाट ब्लूमफील्ड क्रिकेट एण्ड एथलेटिक क्लबविरुद्ध ६ बलमा छक्का प्रहार गरेका हुन् ।

आर्मी ग्राउन्ड पनागोडामा टस जितेर पहिला ब्याटिङ थालेको आर्मी स्पोटर््स क्लबले ४१ ओभरमा ३ विकेट गुमाउँदै ३ सय १८ रन बनाएको थियो । पाँचौं नम्बरमा २० बल बाँकी रहँदा थिसेरा परेरा ब्याटिङको लागि मैदान छिरेका थिए । लिष्ट ए क्रिकेटमा १३ बलमा बनेको सर्वाधिक छिटो दोस्रो अर्धशतक हो । सन् २००५ मा कौशल्या वीरत्नेले १२ बलमा लिष्ट ए मा अर्धशतक पूरा गरेका थिए ।

जसक्रममा थिसेरा परेराले १३ बलमा ८ छक्का सहित ५२ रनमा अविजित रहे । परेराले ४१ औं ओभरमा स्पिनर दिलन कोरेलाई लगातार ६ बलमा ६ छक्का प्रहार गरेका थिए । ६ बलमा ६ छक्का प्रहार गर्ने पहिलो श्रीलंका खेलाडी समेत बनेका छन् । आर्मीका ओपनर अशान रंडिकाले १ सय १६ बलमा ७ चौका र ८ छक्का सहित १ सय २४ रनको शतकीय इनिङ खेले । हिमाशा लियायन्जले ९३ बलमा ७ चौका र ३ छक्का सहित १ सय १ रनमा अविजित रहे ।

टि२० आई क्रिकेटमा सर्वाधिक पहिला सन् २००७ मा भारतीय क्रिकेटका अलराउन्डर युवराज सिंहले इंग्ल्यान्डविरुद्ध ६ बलमा ६ छक्का प्रहार गरेका थिए । युवराजले स्टुअर्ट ब्रोडलाई ६ बलमा ६ छक्का प्रहार गरेका थिए । केहि साता अघि वेस्टइन्डिजका अलराउन्डर काइरन पोलार्डले श्रीलंकाविरुद्ध ६ बलमा ६ छक्का प्रहार गरेका थिए । पोलार्डले स्पिनर अकिला धनञ्जयलाई प्रहार गरेका थिए ।

त्यस्तै गारफील्ड सोबर्स, रवि शास्त्री, हर्शल गिब्स, रस व्हाइटली, हज्रातुल्ला जाजाई, लियो कार्टरले पनि ६ बलमा ६ छक्का प्रहार गरेका छन् ।