काठमाडौं (हाम्रो खेलकुद) – नेपाली राष्ट्रिय क्रिकेट टोलीकी कप्तान रुविना क्षेत्री बेलबासेको कप्तानीमा प्रदेश-१ ले ललितपुर मेयर महिला च्याम्पियनसिप–२०७७ प्रतियोगिताको लागि १४ सदस्य बलियो टोली घोषणा गरेको छ ।

ललितपुर मेयर महिला च्याम्पियनसिप चैत २१ देखि २८ सम्म टियु मैदानमा हुँदै छ । प्रदेश-१ ले गत पुषमा दाङको लमहीमा सम्पन्न प्रधानमन्त्री कप महिला राष्ट्रिय प्रतियोगिता फाइनलमा नेपाल एपिएफ क्लबलाई ६ रनले हराउँदै उपाधि जित्ने क्रममा इतिहास रचेको थियो । उक्त उपाधि प्रदेश-१ महिला टोलीले जितेको पहिलो राष्ट्रिय प्रतियोगिता थियो । उपाधिको बलियो दाबेदार प्रदेश १ मा नेपाली सिनियर टोलीबाट खेलेका ६ खेलाडी छन् । कप्तान रुविनासँगै काजल श्रेष्ठ, अप्सरी बेगम, रोमा थापा, सबनम राई र संगिता राईले नेपालबाट खेलि सकेका छन् । त्यस्तै युवा खेलाडी निग्मा तामाङ, लकिता राजबंशी र ज्योति दनवार नेपालको यू-१९ टोलीबाट खेलेका खेलाडी हुन् ।

ललितपुर मेयर कपमा प्रधानमन्त्री कपमा सेमिफाइनलमा पुगेका प्रदेश १, नेपाल एपिएफ क्लब, लुम्बिनी प्रदेश, सुदूरपश्चिमसँगै ललितपुर मेयर–११ गरि पाँच टोली छन् । प्रधानमन्त्री कपमा सहभागिता जनाएका प्रदेश–२, बागमती, गण्डकी र कर्णालीका खेलाडीको प्रदर्शनलाई आधार मान्दै मेयर–११ को टोली बनाईएको छ ।

प्रदेश १ ले पहिलो खेल चैत २१ मा एपिएफसँग खेल्दै सुरुवात गर्ने छ । चैत २३ मा लुम्बिनीसँग खेल्ने छ । चैत २४ मा सुदूरपश्चिम र चैत २७ मा ललितपुर ११ सँग खेल्ने छ ।

प्रदेश-१ को टोली : रुविना क्षेत्री बेलबासे (कप्तान), काजल श्रेष्ठ (उपकप्तान तथा विकेटकिपर), अप्सरी बेगम, रोमा थापा, संगीता राई, सबनम राई, ज्योति दनवार, निंग्मा तामाङ, निशा शाह, लकिता राजबंशी, अलिशा खडिया, स्मृति कटुवाल, प्रज्ञा कटुवाल र टिका शाह ।