एजेन्सी – कप्तान बाबर आजमको उत्कृष्ट कीर्तिमानी शतकको सहयोगमा पाकिस्तानले तेस्रो टि२० आई खेलमा दक्षिण अफ्रिकालाई ९ विकेटले पराजित गरेको छ । योसँगै चार टि२० आई सिरिजमा पाकिस्तानले २–१ को अग्रता लिएको छ ।

जितको लागि २ सय ४ रनको विजयी लक्ष्य पछ्याएको पाकिस्तानले १८ ओभरमा १ विकेटको क्षतिमा पूरा गर्यो । पाकिस्तानले यो आफ्नो टि२० आई इतिहासकै सर्वाधिक ठूलो लक्ष्य पूरा गरेको हो ।

कप्तान बाबर आजमले ५९ बलमा १५ चौका र ४ छक्का सहित १ सय २२ रनको उत्कृष्ट कीर्तिमानी इनिङ खेले । बाबर टि२० आई मा लक्ष्य पछ्याउँदा सर्वाधिक रन बनाउने कप्तान बनेका छन् । बाबरले नेपाली राष्ट्रिय क्रिकेट टोलीका पूर्व कप्तान तथा ब्याट्सम्यान पारस खड्काको सिंगापुरविरुद्ध १ सय ६ रनको अविजित इनिङको कीर्तिमान तोडेका हुन् । समग्रमा पाकिस्तानबाट टि२० आईमा शतक प्रहार गर्ने तेस्रो खेलाडी हुन् । एकै इनिङमा पाकिस्तानबाट टि२० आईमा सर्वाधिक रन बनाउने ब्याट्सम्यान पनि बनेका छन् । बाबरले ४९ बलमा शतक पूरा गरेका थिए ।

अर्का ओपनर मोहम्मद रिजवान ४७ बलमा ५ चौका र २ छक्का सहित ७३ रनमा अविजित रहे । पहिलो विकेटका लागि बाबर र रिजवानले १७.४ ओभरमा १ सय ९७ रनको उत्कृष्ट कीर्तिमानी साझेदारी गरेपछि विशाल लक्ष्य पाकिस्तानले सहजै पूरा गरेको हो । जुन पाकिस्तानका ब्याट्सम्यानले टि२० आई मा गरेको कुनैपनि विकेटका लागि उच्च साझेदारीमा हो ।

त्यसअघि टस हारेर पहिला ब्याटिङ थालेको दक्षिण अफ्रिका निर्धारित २० ओभरमा ५ विकेट गुमाउँदै २ सय ३ रन बनाएको थियो । दक्षिण अफ्रिका ओपनर एडेन माक्ररम ३१ बलमा ६ चौका र ४ छक्का सहित सर्वाधिक ६३ रन बनाए । अर्का ओपनर जानेमान मलानले ४० बलमा ५ चौका र २ छक्का सहित ५५ रनको योगदान दिए । पहिलो विकेटका लागि माक्ररम र मलानले १ सय ८ रनको साझेदारीका साथ राम्रो सुरुवात दिलाएका थिए । रास्सी भान डर डुसेन ३४ रनमा अविजित रहँदा जर्ज लिन्डे २२, हेनरिक क्लासेन १५ र एन्डिले फहलुकवयो ११ रनमा आउट भए ।

पाकिस्तानका मोहम्मद नवाजले सर्वाधिक २ विकेट लिए । पाकिस्तान पहिलो खेलमा ४ विकेटले विजयी हुँदा दोस्रो खेलमा ६ विकेटले पराजित भएको थियो । निर्णायक चौथो खेल शुक्रबार हुने छ ।