एजेन्सी – तीव्र गतिका बलर दीपक चाहरको घातक बलिङमा पन्जाब किंग्सले इन्डियन प्रिमियर लिग (आइपिएल) २०२१ को आठौं खेलमा चेन्नई सुपर किंग्सलाई १ सय ७ रनको सामान्य लक्ष्य दिएको छ ।

वानखडे स्टेडियम मुम्बईमा टस हारेर पहिला ब्याटिङ थालेको पन्जाबले निर्धारित २० ओभरमा ८ विकेट गुमाउँदै १ सय ६ रन बनायो ।
पन्जाबका शाहरुख खानले ३६ बलमा ४ चौका र २ छक्का सहित सर्वाधिक ४७ रनको योगदान दिए । झेय रिचर्डसनले २२ बलमा २ चौका सहित १५ रन बनाए । एक समय २६–५ को कमजोर अवस्थामा पुगेको पन्जाबलाई छैटौं विकेटका लागि महत्वपूर्ण ३१ रनको साझेदारी गरेका थिए । अन्य कुनैपनि ब्याट्सम्यानले राम्रो प्रदर्शन गर्न सकेनन् ।

तीव्र गतिका बलर दीपक चाहरले ओपनर मयंक अग्रवाललाई शून्यमा बोल्ड आउट गर्दै पहिलो सफलता दिलाएका थिए । तेस्रो ओभरको पाँचौं बलमा रविन्द्र जडेजाले कप्तान लोकेश राहुललाई डाइरेक्ट स्टम्प टाक्दै ५ रनमा रन आउट गरेपछि पन्जाबको विकेट एकपछि अर्को गुम्न पुगेको थियो । पाँचौं ओभरको दोस्रो बलमा दीपकले क्रिस गेललाई १० रनमा रविन्द्र जडेजाबाट क्याच आउट गराएका थिए । एक बल पछि निकोलस पुरन शून्यमा शार्दूल ठाकुरबाट क्याच आउट हुन पुगेपछि पन्जाब १९–४ को कमजोर अवस्थामा पुगेको थियो ।

सातौं ओभरको दोस्रो बलमा दीपक हुडालाई १० रनमा फाफ डु प्लेसिसबाट क्याच गराउँदै दीपकले पन्जाबलाई २६–५ को कमजोर अवस्थामा पुर्याएका थिए । शाहरुख खान अन्तिम ओभरको दोस्रो बलमा ठूलो सट खेल्नेक्रममा जडेजाबाट रन आउट हुन पुगेका थिए । मुरुगन आश्विन ६ र मोहम्मद शामीले ९ रनको योगदान दिए । चेन्नईका तीव्र गतिका बलर दीपक चाहरले ४ ओभरमा १ मेडन सहित १३ रन खर्चेर ४ विकेट लिए । ड्वेन ब्राभो, साम करन र मोईन अलीले १–१ विकेट लिए ।