एजेन्सी – पाकिस्तानले अन्तिम तथा चौथो टि२० आई खेलमा घरेलु टोली दक्षिण अफ्रिकालाई ३ विकेटले पराजित गर्दै टि२० सिरिज जितेको छ । शुक्रबार राती अन्तिम खेलमा दक्षिण अफ्रिकालाई हराउँदै चार टि२० आई सिरिज पाकिस्तानले ३–१ ले जितेको हो ।

जितको लागि १ सय ४५ रनको विजयी लक्ष्य पछ्याएको पाकिस्तानले १९.५ ओभरमा ७ विकेटको क्षतिमा पूरा गर्यो । पाकिस्तानलाई अन्तिम दुई बलमा दुई रन चाहिँएको अवस्थामा मोहम्मद नवाजले छक्का प्रहार गर्दै पाकिस्तानको सिरिज पक्का गराएका थिए ।

मोहम्मद नवाज २१ बलमा १ चौका र २ छक्का सहित २५ रनमा अविजित रहे । फखर जमानले ३४ बलमा ५ चौका र ४ छक्का सहित सर्वाधिक ६४ रनको योगदान दिए । कप्तान बाबर आजम २४, मोहम्मद अफिज १० रनमा आउट भए । एक समय ९.२ ओभरमा ९२–२ को बलियो अवस्थामा रहेपनि त्यसपछि लगातार विकेट गुमाउँदा खेल अन्तिम ओभर सम्म पुगेको थियो । दक्षिण अफ्रिका सिसान्डा मागला र लिजाड विलियम्सले २–२ विकेट लिए ।

त्यसअघि टस हारेर पहिला ब्याटिङ थालेको दक्षिण अफ्रिका १९.३ ओभरमा १ सय ४४ रनमा अल आउट भएको थियो । दक्षिण अफ्रिका रास्सी भान डर डुसेन ३६ बलमा ५ चौका र २ छक्का सहित सर्वाधिक ५२ रनको योगदान दिए । ओपनर जानेमान मलान २८ बलमा ३ चौका र १ छक्का सहित ३३ रनमा आउट भए । एडेन माक्ररम ११, हेनरिक क्लासेन ९, जर्ज लिन्डे ३ र मुल्डर ६ रनमा आउट भए । पाकिस्तानका तीव्र गतिका बलर हसन अली र फहिम अशरफले समान ३–३ विकेट लिए । हरिस रौफले २, मोहम्मद नवाज र शाहिन अफ्रिदीले १–१ विकेट लिए ।

पहिलो टि२० खेलमा पाकिस्तान ४ विकेटले विजयी हुँदा दोस्रो खेलमा ६ विकेटले पराजित भएको थियो । तेस्रो खेलमा पाकिस्तान ९ विकेटले विजयी भएको थियो । पाकिस्तानले तीन ओडिआई सिरिज २–१ ले जितेको थियो । पाकिस्तानलाई चार टि२० सिरिज ३-१ ले जिताउन उत्कृष्ट प्रदर्शन गरेका कप्तान बाबर आजम सर्वोत्कृष्ट खेलाडी (प्लेयर अफ द सिरिज) चुनिए ।