एजेन्सी – इंग्ल्यान्डले श्रीलंकाविरुद्ध तीन टि२० आई सिरिज एक खेल अगावै जितेको छ । बिहिबार राती सम्पन्न दोस्रो खेलमा श्रीलंकालाई ५ विकेटले हराउँदै सिरिज जितेको हो ।

वर्षाको कारण इंग्ल्यान्डले १८ ओभरमा जितको लागि १ सय ३ रनको विजयी लक्ष्य पाएको थियो । उक्त लक्ष्य इंग्ल्यान्डले १६.१ ओभरमा ५ विकेटको क्षतिमा पूरा गरेको थियो । इंग्ल्यान्डका साम करण ८ बलमा १ चौका र १ छक्का सहित १६ रनमा अविजित रहे । लियाम लिभिङस्टोन २६ बलमा १ छक्का सहित २९ रनमा अविजित रहे ।

साम विलिंग्स २४, कप्तान ओईन मोर्गन ११, डेविड मलान ४, जोनी बेयरस्टो शून्य र जेसन रोय १७ रनमा आउट भए । श्रीलंका स्पिनर वानिन्दु हसरंगाले सर्वाधिक २ विकेट लिए । ईसुरु उडाना, बिनुरा फ्रेनान्डो र दुशमन्था चमिराले १–१ विकेट लिए ।

त्यसअघि कार्डीफमा टस जितेर ब्याटिङ थालेको श्रीलंकाले निर्धारित २० ओभरमा ७ विकेट गुमाउँदै १ सय ११ रन बनाएको थियो । श्रीलंका उपकप्तान कुशल मेन्डिसले ३९ बलमा ३ चौका र १ छक्का सहित सर्वाधिक ३९ रन बनाए । कप्तान कुशल पेरेराले २५ बलमा २१ रन जोडे । तल्लोक्रममा ईसुरु उडाना १४ बलमा १ चौका र १ छक्का सहित १९ रनमा अविजित रहे ।

अन्य कुनैपनि ब्याट्सम्यानले दोहोरो अंकमा रन जोड्न सकेनन् । इंग्ल्यान्डका स्पिनर आदिल राशिद र तीव्र गतिका बलर मार्कवुडले २–२ विकेट लिए । साम करण र क्रिस जोर्डनको नाममा १–१ विकेट रह्यो । पहिलो खेलमा इंग्ल्यान्ड ८ विकेटले विजयी भएको थियो । अन्तिम टि२० आई खेल शनिवार हुने छ ।