एजेन्सी – पाकिस्तान सुपर लिग २०२१ को उपाधि मुल्तान सुल्तानले जितेको छ । बिहिबार राती मुल्तान सुल्तानले पेशावार जाल्मीलाई फाइनलमा ४७ रनले पराजित गर्दै उपाधि जितेको हो ।

जितको लागि २ सय ७ रनको विजय लक्ष्य पछ्याएको पेशावारले निर्धारित २० ओभरमा ९ विकेट गुमाउँदै १ सय ५९ रन बनाउन सक्यो । पेशावारका अनुभवी खेलाडी शोएब मलिकले २८ बलमा ३ चौका र ३ छक्का सहित सर्वाधिक ४८ रनको योगदान दिए । ओपनर तथा विकेटकिपर कमरन अकमलले २८ बलमा ५ चौका र १ छक्का सहित ३६ रनको योगदान दिए । रोभमन पवेल २३ र शेर्फान रदरफोर्डले १८ रनको योगदान दिए । मुल्तानका स्पिनर ईमरान ताहिरले ४ ओभरमा ३३ रन खर्चेर ३ विकेट लिए । बेलासिङ मुर्जावानी र ईमरान खानले २–२ विकेट लिए ।

त्यसअघि शेख जायद स्टेडियम आबूधाबीमा टस हारेर ब्याटिङको निम्तो पाएको मुल्तान सुल्तानले निर्धारित २० ओभरमा ६ विकेट गुमाउँदै २ सय ६ रन बनाएको थियो । मुल्तानका मध्यक्रमका ब्याट्सम्यान सोहीब मकसूदले ३५ बलमा ६ चौका र ३ छक्का सहित सर्वाधिक ६५ रनको अविजित इनिङ खेले ।

ओपनर शन मसूद २९ बलमा ६ चौका सहित ३७ रनमा आउट भए । राईली रोसउले २१ बलमा ५ चौका र ३ छक्का सहित ५० रन जोड्दै राम्रो योगफलमा पुर्याएका थिए । खुसदिल ५ बलमा २ छक्का सहित १५ रनमा अविजित रहे । पेशावारका समिन गुल र मोहम्मद इफरानले २–२ विकेट लिए ।

मुल्तान सुल्तानका सोहिब मकसूद प्लेयर अफ द फाइनल र टुनामेन्ट घोषित भए । मकसूदले प्रतियोगिताभर १२ खेलमा ५ अर्धशतक सहित कुल ४ सय २८ रन जोडेका थिए । प्रतियोगिता उत्कृष्ट विकेटकिपर सुल्तानका कप्तान मोहम्मद रिजवान चुनिए । रिजवानले १२ खेलमा ५ सय रन जोेडेका थिए ।