एजेन्सी– भारतका युवा स्टार ओपनर सुभमन गिलले अर्को महिना देखि सुरु हुने इंग्ल्यान्डविरुद्ध पाँच टेस्ट खेलको सिरिज गुमाउने उच्च सम्भावना रहेको छ । गिलको बायाँ खुट्टा मांशपेशीमा चोट लागेको छ ।

भारतीय सञ्चार माध्यमका अनुसार गिल दुई महिना टोली बाहिर रहने छन् । यद्ययी भारतीय टोलीले गिलको चोट बारे औपचारिक कुनै जानकारी भने दिएको छैन । इंग्ल्यान्ड भ्रमणमा रहेको भारतले पहिलो टेस्ट चार अगष्टमा खेल्ने छ । इंग्ल्यान्डमा घरेलु मैदानमा पराजित गर्न भारतलाई सहज हुने छैन । विश्व टेस्ट च्याम्पियनसिप २०२१/२३ पनि इंग्ल्यान्ड र भारतबीचको सिरिजबाट सुरु हुने छ । अघिल्लो हप्ता भारत आइसिसी विश्व टेस्ट च्याम्पियनसिप फाइनलमा न्युजिल्यान्डसँग आठ विकेटले पराजित भएको थियो । गिलले पहिलो इनिङमा २८ रन र दोस्रो इनिङमा ८ रन जोडेका थिए ।

गिल अनुपस्थित हुँदा उनको स्थानमा मयंक अग्रवाल खेल्ने छन् । मयंक भारतका पहिलो रोजाईका ओपनर हुन् । भारतको ओपनिङ रोहित शर्मा र मयंकले गर्ने छन् । लोकेश राहुल र वैकल्पिक खेलाडी अभिमन्यु ईश्वरन भारतको ओपनरको रुपमा इंग्ल्यान्ड भ्रमणमा छन् । राहुलले झण्डै दुई वर्षदेखि भारतीय टेस्ट टोलीबाट खेलेका छैनन् । अभिमन्यु अनक्याप्ड खेलाडी हुन् । २०२०/२१ मा गिलले अष्ट्रेलियाविरुद्ध डेब्यू गरेका थिए । गिलले ८ टेस्टमा ४ सय १४ रन बनाएका छन् ।

भारतको टोली : रोहित शर्मा, सुभमन गिल, मयंक अग्रवाल, चेतेश्वर पुजारा, विराट कोहली (कप्तान), अजिक्या रहाने (उपकप्तान), हनुमा विहारी, ऋषभ पन्त (विकेटकिपर), रविचन्द्रन आश्विन, रविन्द्र जडेजा, अक्षर पटेल, वासिन्टन सुन्दर, जस्प्रित बुमराह, ईशान्त शर्मा, मोहम्मद शिराज, मोहम्मद शामी, शार्दूल ठाकुर, उमेश यादव, लोकेश राहुल , ऋद्धिमान शाह

वैकल्पिक खेलाडी : अभिमन्यु ईश्वरन, प्रसिद्ध कृष्णा, आवेश खान र अरजान नागवासवाला

इंग्ल्यान्ड र भारतबीचको पाँच टेस्ट सिरिज

पहिलो टेस्ट : ४ देखि ८ अगष्ट, नोटिंघम

दोस्रो टेस्ट : १२ देखि १६ अगष्ट, लर्ड्स

तेस्रो टेस्ट : २५ देखि २९ अगष्ट, लिड्स

चौथो टेस्ट : २ देखि ६ सेप्टेम्बर, लन्ड्न

पाँचौ टेस्ट : १० देखि १४ सेप्टेम्बर, म्यानचेष्टर