एजेन्सी – इंग्ल्यान्डले श्रीलंकाविरुद्ध तीन ओडिआई खेलको सिरिज एक खेल अगावै जितेको छ । दोस्रो ओडिआई खेलमा विहिबार राती इंग्ल्यान्डले ब्याटिङ र बलिङ दुबैमा उत्कृष्ट प्रदर्शनका साथ श्रीलंकालाई आठ विकेटले हराउँदै सिरिज जितेको हो ।

जितको लागि २ सय ४२ रनको मध्यम विजयी लक्ष्य इंग्ल्यान्डले ४३ ओभरमा दुई विकेटको क्षतिमा पूरा गर्यो । इंग्ल्यान्डको जितमा कप्तान ओईन मोर्गन ८३ बलमा आठ चौका र एक छक्का सहित सर्वाधिक ७५ रनमा अविजित रहे । जो रुट ८७ बलमा पाँच चौका सहित ६७ रनमा अविजित रहे ।

तेस्रो विकेटका लागि मोर्गन र रुटले १ सय ४० रनको अविजित साझेदारी गर्दै टोलीलाई सहज जित दिलाए । ओपनर जेसन रोय ५२ बलमा १० चौका सहित ६० रनमा क्याच आउट भएका थिए । जोनी बेयरस्टो ३६ बलमा तीन चौका र एक छक्का सहित २९ रनमा बोल्ड आउट भए । श्रीलंका वानिन्दु हसरंगा र चमिका करुणारत्नेले एक एक विकेट लिए ।

त्यसअघि दी ओभल लन्डनमा टस हारेर ब्याटिङ थालेको श्रीलंकाले ५० ओभरमा ९ विकेट गुमाउँदै २ सय ४१ रन बनाएको थियो । एक समय २१–४ को कमजोर अवस्थामा रहेको श्रीलंकाले राम्रो पूनरागमन गराउदै मध्यम योगफल बनाएको हो । श्रीलंका स्पिन अलराउन्डर धनन्जय शिल्भाले ९१ बलमा १३ चौका सहित सर्वाधिक ९१ रनको योगदान दिए । दोस्रो ओभरमा युवा तीव्र गतिका बलर स्याम करनले दुई प्रमुख ब्याट्सम्यानलाई आउट गर्दै इंग्ल्यान्डलाई उत्कृष्ट सुरुवात दिलाएका थिए । दोस्रो ओभरको दोस्रो बलमै स्याम करणले कप्तान कुसल पेरेरालाई शून्यमा एलबिडब्लू आउट गरे ।

पेरेराले रिभ्यु लिएपनि सफल हुन सकेनन् । दुई बलपछि अविष्का फ्रेनान्डो पनि दुई रनमा एलबिडब्लू आउट हुन पुगेका थिए । करनलेनै चौथो ओभरको तेस्रो बलमा पाथुम निसंकालाई पाँच रनमा बोल्ड आउट गर्दै श्रीलंकालाई १२–३ को दयनिय अवस्थामा पुर्याएका थिए । सातौं ओभरको पाँचौँ बलमा चरिथ असलान्का तीन रनमा क्याच आउट हुँदा श्रीलंका २१–४ को संकट अवस्थामा पुगेको थियो । उक्त अवस्थाबाट श्रीलंकाले खेलमा उत्कृष्ट पूनरागमन गर्न सफल भएको थियो ।

पाँचौं विकेटका लागि धनन्जय र वानिन्दु हसरंगाले ८२ बलमा ६५ रनको महत्वपूर्ण साझेदारी गर्दै श्रीलंका संकट टारेका थिए । करनलेनै २१ औं ओभरको तेस्रो बलमा वानिन्दुलाई २६ रनमा साम विलिंग्सबाट क्याच गराउँदै इंग्ल्यान्डलाई पाँचौं सफलता दिलाएका थिए । वानिन्दुले ४९ बलमा दुई चौका प्रहार गरे । छैटौं विकेटका लागि धनन्जय र दसुन शनकाले ८४ बलमा ७८ रनको उत्कृष्ट साझेदारी गर्दै श्रीलंकालाई पूनरागमन गराएका थिए ।

डेविड विल्लीको ३५ औं ओभरको चौथो बलमा ठूलो खेल्ने धुनमा धनन्जय डीप स्क्वायरमा जो रुटबाट क्याच आउट हुन पुगेपछि आफ्नो ओडिआई करिअरको पहिलो शतक बनाउन नौं रनले चुकेका थिए । धनन्जयको यो ओडिआई करिअरकै सर्वोत्कृष्ट प्रदर्शन हो । सातौं विकेटका लागि शनका र चामिक करुणारत्नले ४२ रनको साझेदारी गर्दै दुई सय माथिको योगफल कटाएका थिए ।

शनका ६७ बलमा दुई चौका र एक छक्का सहित ४७ रनमा क्याच आउट भए । करुणारत्ने २१ रनमा क्याच आउट भए । बिनुरा फ्रेनान्डोले १५ बलमा तीन चौका १७ सहित रन जोडे । दुश्मन्था चामिरा १२ बलमा एक छक्का सहित १४ रनमा अविजित रहे ।

इंग्ल्यान्डका स्याम करनले १० ओभरमा एक मेडन सहित ४८ रन खर्चेर पाँच विकेट लिए । करनले ओडिआईमा पहिलो पटक पाँच विकेट लिएका हुन् । अर्का बायाँ हाते तीव्र गतिका बलर डेविड विल्लीले १० ओभरमा एक मेडन सहित ६४ रन खर्चेर चार विकेट लिए । पहिलो खेलमा इंग्ल्यान्ड पाँच विकेटले विजयी भएको थियो । तेस्रो तथा अन्तिम खेल आतइबार हुने छ ।