काठमाडौं (हाम्रो खेलकुद)– हालै भलिबलको मुख्य प्रशिक्षकमा नियुक्त भएकी सलिना श्रेष्ठलाई नेपाल भलिबल संघले आइतबार बधाई दिएको छ । नेपाल विद्यालय भलिबल कमिसन गठन घोषणाको अवसरमा संघले श्रेष्ठलाई बधाई दिएको हो । नेपाल भलिबल संघका अध्यक्ष मनोरञ्जनरमण शर्मा,उपाध्यक्ष निरोज मास्केलगायतका पदाधिकारीले वधाई दिएका थिए । 

भलिबलकी मुख्य प्रशिक्षक सलिना श्रेष्ठ (बायाँ) लाई बधाई दिदै नेपाल भलिबल संघका अध्यक्ष मनोरञ्जन रमण शर्मा । साथमा संघकी उपाध्यक्ष निरोज मास्के ।

राष्ट्रिय खेलकुद परिषद् (राखेप) ले यसअघिका मुख्य प्रशिक्षक सुदेश रिमाललाई उपनिर्देशकमा बढुवाको गरेको थियो । त्यसपछि राखेपले श्रेष्ठलाई मुख्य प्रशिक्षकको जिम्मेवारी दिएको हो । नेपालमा १७ बर्षअघि भएको आठौं दक्षिण एसियाली खेलकुद (साफ हालको साग) मा महिला राष्ट्रिय टोलीले कास्य पदक जित्दा श्रेष्ठ प्रशिक्षक थिइन् । २०४६ सालमा राखेपमा भलिबल प्रशिक्षकका रुपमा नियुक्त भएकी श्रेष्ठ ०६३ मा वरिष्ठ प्रशिक्षकमा बढुवा भएकी थिइन् ।