काठमाडौं (हाम्रो खलकुद)– बंगलादेशको ढाकामा आज सुरु भएको बंगबन्धु एसियाली सेन्ट्रल जोन भलिबल च्याम्पियनसिपमा नेपाल र माल्दिभ्सबीच प्रतिस्पर्धा हुँदैछ । नेपाल र माल्दिभ्सको खेल बंगलादेशको स्थानिय समयअनुसार साँझ ६ बजे सुरु हुनेछ ।
इम रानाको कप्तानीमा रहेको नेपाली पुरुष टोली मंगलबार ढाका पुगेको थियो । टोली बुधबार केही समय अभ्यासमा बिताएको थियो । टोलीका प्रशिक्षक जगदिश भट्ट पहिलो खेललाई लिएर उत्साहित छन् । उनले भने,‘हामी पहिलो खेलका लागि तयार छौं र जितको लागि पुरा प्रयास गर्नेछौं । खेलाडीको मनोबल पनि उच्च छ । ’
च्याम्पियनसिपमा ५ देशको मात्र सहभागिता रहेको छ । च्याम्पियनसिपमा नेपाल, माल्दिभ्ससहित सहित किर्गिस्तान, अफगानिस्तान र आयोजक बंगलादेशको सहभागिता छ । बिहीबार आयोजक बंगलादेश र अफगानिस्तानबीच पहिलो खेल भएको थियो ।
लिग कम नकआउटका आधारमा हुने च्याम्पियनसिपमा नेपालले शुक्रबार बंगलादेश, शनिबार अफगानिस्तान र अन्तिम खेल सोमबार किर्गिस्तानसँग खेल्नेछ । सबैले एकअर्कासँग खेलेपछि समूहका शीर्ष दुई टोलीले फाइनलमा प्रतिस्पर्धा गर्ने छन् । तेस्रो र चौथो टोलीबीच कास्य पदकका लागि प्रतिस्पर्धा गर्नेछन् ।
नेपाली टोली कप्तान इमसहित हरिहजुर थापा, मानबहादुर श्रेष्ठ, धनबहादुर भट्ट, विजय थापा,कुलबहादुर थापा, महेन्द्र श्रेष्ठ, भैरवबहादुर बम,भुवन कार्की, नरेन्द्र गिरी, देव शर्मा र इश्वर थापा छन् ।
