काठमाडौं (हाम्रो खलकुद)– नेपालले जितबाट बंगलादेशको ढाकामा बिहीबार सुरु भएको बंगबन्धु एसियाली सेन्ट्रल जोन भलिबल च्याम्पियनसिपको यात्रा सुरु गरेको छ । प्रतिस्पर्धात्मक खेलमा नेपालले माल्दिभ्सलाई ३–१ ले हराएको छ ।

नेपाल २६–२४,१५–२५,२५–१९ र २६–२४ विजयी भएको थियो । प्रतिस्पर्धात्मक पहिलो सेटमा झिनो अन्तरको जित हासिल गरेको नेपालले दोस्रो सेटमा फराकिलो अन्तरले गुमाएको थियो । तेस्रो सेटमा नेपाल पुनः खेलमा फर्केको नेपालले चौथो सेट पनि आफ्नो पक्षमा पारेको थियो ।
च्याम्पियनसिपमा ५ देशको मात्र सहभागिता रहेको छ । च्याम्पियनसिपमा नेपाल, माल्दिभ्ससहित सहित किर्गिस्तान, अफगानिस्तान र आयोजक बंगलादेशको सहभागिता छ । लिग कम नकआउटका आधारमा हुने च्याम्पियनसिपमा नेपालले शुक्रबार बंगलादेश, शनिबार अफगानिस्तान र अन्तिम खेल सोमबार किर्गिस्तानसँग खेल्नेछ ।

सबैले एकअर्कासँग खेलेपछि समूहका शीर्ष दुई टोलीले फाइनलमा प्रतिस्पर्धा गर्ने छन् । तेस्रो र चौथो टोलीबीच कास्य पदकका लागि प्रतिस्पर्धा गर्नेछन् । इम रानाको कप्तानीमा रहेको नेपालीमा  हरिहजुर थापा, मानबहादुर श्रेष्ठ, धनबहादुर भट्ट, विजय थापा,कुलबहादुर थापा, महेन्द्र श्रेष्ठ, भैरवबहादुर बम,भुवन कार्की, नरेन्द्र गिरी, देव शर्मा र इश्वर थापा छन् ।