काठमाडौं (हाम्रो खेलकुद)– नेपाल बंगलादेशमा जारी बंगबन्धु एभिसी सेन्ट्रल जोन भलिबल च्याम्पियनसिपको फाइनल पुग्न असफल भएको छ ।
सोमबार किर्गिस्तानसँग ३–१ ले पराजित भएपछि अब नेपालले कास्य पदकका लागि माल्दिभ्ससँग प्रतिस्पर्धा गर्नेछ । गत बर्ष पहिलो सहभागितामा पनि नेपालले कांस्य पदकका लागि प्रतिस्पर्धा गरेको थियो । तर, टोली पदक विहिन भएर फेर्केको थियो ।
सोमबार किर्गिस्तानसँगको सुरुआती दुई सेट गुमाएर पनि तेस्रो सेटमा पुनरामगन गरेको नेपाल चौथो सेटमा पुनः पराजित भएको थियो । अघिल्ला तीनमध्ये दुई खेल जित्दै नेपालले फाइनल पुग्ने सम्भावनालाई जीवित राखेपनि प्रतियोगिताको सबैभन्दा बलियो दाबेदारसँग हारेपछि नेपालले फेरी एकपटक कास्य पदकका लागि प्रतिस्पर्धा गर्नुपर्नेछ । किर्गिस्तानसँग नेपाल १८–२५, १२–२५, २६–२४ र १०–२५ को सेटमा पराजित भएको थियो ।
अब केही समयमा माल्दिभ्ससँगको खेलमा हारेपनि आयोजक बंगलादेशले फाइनलमा स्थान सुरक्षित पारिसकेको छ । किर्गिस्तानको ११, एक खेल कम खेलेको बंगलादेशको ७, नेपालको ५ र माल्दिभ्सको ३ अंक छ । अफगानिस्तान सबै खेल गुमाउँदै प्रतियोगिताबाट बाहिरिसकेको छ ।
