प्रकाश तिमल्सिना
काठमाडौं– एभिसी सेन्ट्रल जोन भलिबल च्याम्पियनसिपमा पदक विहिन हुनु परेपनि नेपाली टोलीको प्रदर्शनमा क्रमशः सुधार भइरहेकोले निराश हुनु नपर्ने पूर्व प्रशिक्षक कपिल किशोर श्रेष्ठ बताएका छन् । बंगालदेशको ढाकामा मंगलबार तेस्रो स्थानको प्रतिस्पर्धामा नेपाल माल्दिससँग ३–१ ले पराजित भएपछि लगातार दोस्रो बर्ष पदक विहिन भएर फर्कनु पर्ने भएको छ ।

‘गत बर्षपछि हामी यहि अवस्थाबाट हारेर फर्केका थियौं । कुनै पनि खेलकुदमा एक दुई बर्षमै सफलता पाइन्छ भन्ने छैन,’श्रेष्ठले भने, ‘हामीले हेर्न भनेको विगतमा भन्दा प्रदर्शनमा सुधार भएको छ÷छैन भन्ने हेर्ने हो । त्यस हिसाबले खेलाडीको प्रदर्शनमा परिपक्कवता आइरहेको छ । आशा गरौं हाम्रो टोलीले अझै राम्रो गर्न सक्छ ।’ नतिजाका हिसाबले गत बर्ष र अहिले त्यति ठूलो अन्तर छैन ।

अघिल्लो पटक जुन टोलीसँग हारेको छ यसपटक ती टोलीमाथि जित्न सफल भएको नेपाल किर्गिस्तानसँग भने पराजित भएको छ । गत बर्ष टोली नेतृत्व गरेका श्रेष्ठले स्मरण गरे‘हामी गत बर्ष माल्दिभ्स र अफगानिस्तानसँग हारेका थियौं । यसपटक लिग चरणमा तीनलाई हराउन सफल भयौं । तर किर्गिस्तान र बंगलादेशसँग पहिला जिते पनि अहिले हार्नु परेको छ । खेलमा हार जित हुन्छ तर समग्रतामा हाम्रो प्रदर्शनमा सुधार भइरहेको छ ।’

नेपालले गर्ने तयारीका आधारमा अहिलेको प्रदर्शनलाई कमजोर मान्न नहुने उनको तर्क छ । ‘हामी तयारी कम गछौं आशा बढी गछौं । तर हाम्रो टोली पर्याप्त अभ्यास र मैत्रीपूर्ण खेल खेल्न नपाई सिधै प्रतियोगितामा जानुपर्छ । त्यसले नजिताको मात्र आशा गरेर हुँदैन’ उनको सुझाव थियो, ‘ यो च्याम्पियनसिपबाट खेलाडीहरुलाई राम्रो एक्सपोजर भएको छ । प्रशिक्षणलाई निरन्तरता र एक्सपोजर म्याच दिइराख्ने हो भने स्वदेशमा आयोजना हुने १३ औं दक्षिण एसियाली खेलकुद (साग) मा हामी कांस्य पदकको दाबेदार बन्न सक्छौं । तर अन्तिम समयमा खेलाडीमा दबाब दिएर मात्र नजिता ल्याउन सकिन्न ।’

यसपटकको च्याम्प्यिनसिपमा समग्रतामा प्रदर्शन सन्तोषजनक भएपनि माल्दिभ्ससँगको तेस्रो स्थानको खेलमा अघिल्ला खेलका दाजोमा प्रदर्शन कमजोर भएको श्रेष्ठको ठम्माई छ । राष्ट्रिय टोलीदेखि स्थानिय विभागिय र अन्य थ्रुपै क्लबलाई प्रशिक्षण दिइरसकेका श्रेष्ठले भने यसपटक खेलाडीको प्रोपर पोजिसनका खेलाडी नखेलाइनु कमजोरी ठान्छन् ।

कप्तान इम रानालाई लिफ्टरबाट स्पाइकमा लादा टोलीको लयमा केही समस्या आएको श्रेष्ठको बुझाई छ । राष्ट्रिय खेलकुद परिषद् (राखेप) का पूर्व मुख्य भलिबल प्रशिक्षक उनले भने, ‘इम पहिला स्पाइकर नै हुन् । तर पछिल्ला बर्षमा उनी लिफटरमा स्थापित भइसकेका थिए । अहिले फेरी उनलाई स्पाइकर खेलाउँदा अपेक्षा अनुसार भएन जस्तो लाग्छ । भलिबलमा ६ जनाको ६ जनालाई रिप्लेस खेलाडी हुन्छ । एउटा पोजिसनको खेलाडी घाइते हुँदा वा खेल्न नसक्दा त्यहि पोजिसनको अर्को खेलाडी उतार्नुपर्छ । त्यसमा हामी चुक्यौं भन्ने लाग्छ ।’

झन्डै ४ दशकदेखि अन्तर्राष्ट्रिय प्रतियोगितामा सहभागिता जनाएपछि भलिबल केही बर्षअघि सम्म निकै सिथिल संघमा गणना हुन्थ्यो । केही बर्षयता मात्र भलिबल संघ पुनः सक्रिय हुन थालेको हो । ‘हामी केही बर्षयताबाट फेरी अन्तर्राष्ट्रिय भलिबलमा फर्केका छौं’ श्रेष्ठले भने, ‘त्यसैले निराश हुनु पर्ने केही छैन । संघले प्रशिक्षणमा ध्यान दिने हो भने हाम्रा खेलाडीले आउने दिनमा अझै राम्रो गर्न सक्छन् ।’