एजेन्सी – इन्डियन प्रिमियर लिग (आइपिएल) २०२३ को मिनी अक्सन शुक्रबार कोचीमा हुनेछ । अक्सनमा कुल ४ सय ५ खेलाडीबाट बढीमा ८७ जना बिक्नेछन् ।

सबै फ्रेन्चाइज टोली अक्सनको तयारीमा छन् । आइपिएल अक्सनमा खेलाडी किन्न आफूसँग पैसापनि त्यतिनै हुनुपर्छ । यस पटक अक्सनमा दुई पटकको च्याम्पियन कोलकता नाइट राइडर्स र हालसम्म उपाधि विहीन रोयल च्यालेन्जर्स बेंगलोर सबैभन्दा कमजोर देखिन्छन् ।

यी दुई फ्रेन्चाइज टोलीसँग अक्सनमा १० करोड भन्दा कम अक्सनमा खर्च गर्न पाउने रकम छ । जुन रकमबाट दुबै फ्रेन्चाइज टोलीले कम मूल्यका खेलाडीमा म्याच विनर खेलाडी किन्नुपर्ने हुन्छ ।

आइपिएल इतिहासमा सुपरस्टारले भरिपूर्ण बेंगलोर हालसम्म उपाधिविहीन छ । २०२३ मा बेंगलोर उपाधि जित्न चाहन्छ । त्यसको लागि अक्सनमा स्टार खेलाडी किन्नुपर्ने हुन्छ । तर अक्सन प्रतिस्पर्धामा बेंगलोरसँग ८ करोड ७५ लाख भारु मात्रै छ । बेंगलोरले ८ करोड ७५ लाखबाट ७ खेलाडी किन्नुपर्ने हुन्छ ।

बेंगलोरलाई के आवश्यक छ ?

बेंगलोरसँग हाल ६ विदेशीसहित कुल १८ खेलाडी छन् । बेंगलोरलाई शीर्षक्रममा एक भरपर्दो ब्याटर आवश्यक देखिन्छ । जसमा भारतीय खेलाडीबाट पूरा गर्नुपर्ने हुन्छ । विराट कोहली र फाफ डु प्लेसिसले ओपनिङ गर्दै आएका छन् । कोहलीलाई तेस्रो नम्बरमा ब्याटिङ गराउँदै मयंक अग्रवाललाई अक्सनमा अनुबन्ध गर्न सक्छ ।

जसले बंगलोरको ब्याटिङक्रम मजबुत बन्न सक्छ । चौथो नम्बरमा रजत पाटिदार, पाँचौं नम्बरमा ग्लेन म्याक्सवेल र छैटौं नम्बरमा दीनेश कार्तिकलाई खेलाउन सक्छ । सातौं नम्बरमा वानिन्दु हसरंगा र आठौं नम्बरमा हर्षल पटेल हुनसक्छन् । जसले ब्याटिङ क्रममा गहिराइ हुनेछ ।

बंगलोरले विदेशी खेलाडी ब्याटरको रुपमा किनेपनि खेलाडी ठाउँ भने देखिदैन । बेंगलोरले चार विदेशी खेलाडीमा ग्लेन म्याक्सवेल, फाफ डु प्लेसिस, वासिनन्दु हसरंगा र जोश हेजलवुडलाई पहिलो रोजाईमा खेलाउने निश्चित छ । यी चार खेलाडीको विकल्प राख्न सक्छ ।

बेंगलोरसँग दुई विदेशी खेलाडीको कोटा बाँकी छ । बेंगलोरले तीव्र गतिका बलर जेसन बेहरनर्डोफ र शेर्फान रदरफोर्डलाई फुकुवा गरेको थियो । एक विदेशी तीव्र गतिका बलर अक्सनमा किन्न सक्छ । तर झन्डै ९ करोड भारुबाट ७ खेलाडी किन्नु पर्ने हुन्छ । कम मूल्यका खेलाडी हेर्नु बाहेक अन्य विकल्प देखिदैन ।

शीर्षक्रमका भारतीय ब्याटर किन्न खोज्ने छ । जसमा मयंक अग्रवाल र पछिल्लो समय सानदार प्रदर्शन गर्दै आएका नारायण जगदीशन राम्रो विकल्प हुन् । तर यी दुई खेलाडीलाई कम मूल्यमा पाउन भने कठिन देखिन्छ । धेरै फ्रेन्चाइजको नजर यी दुई ब्याटरमा देखिन्छ ।

कोलकातालाई के आवश्यक ?

कोलकाताले १५ खेलाडी टोलीबाट फुकुवा गरेको थियो । जसमध्य प्याट कमिन्स, एलेक्स हेल्स र आरोन फिन्च जस्ता खेलाडी थिए । तर आइपिएल ट्रेडमा दुई महँगा खेलाडी लोकी फर्गुसन र शार्दुल ठाकुरलाई टोलीमा लिएपछि मात्रै ७ करोड ५ लाख भारु बाँकी छ ।

कोलकाताले ७ करोडबाट ११ खेलाडी किन्नुपर्ने हुन्छ । ११ मध्य तीन विदेशी खेलाडीको कोटा बाँकी छ । दिल्लीले २०२२ को अक्सनमा शार्दुललाई १० करोड ७५ लाख भारु र लखनउ सुपर जायन्टस्ले १० करोड भारुमा किनेको थियो । यी दुई खेलाडी ट्रेड गरेपछि सबैभन्दा कम रकम भएको हो ।

कोलकातासँग विदेशी खेलाडीको रुपमा लोकी फर्गुसन, टिम साउथी, शार्दुल ठाकुर र उमेश यादव छन् । कोलकाताको तीन विदेशी खेलाडीमा फर्गुसन, आन्द्रे रसेल र सुनिल नारायणको स्थान पक्का छ । चौथो विदेशी खेलाडीमा रहमानउल्लाह गुरबाज राम्रो विकल्प हुन् ।

अक्सनमा कोलकाताले विदेशी खेलाडीमा एक प्रमुख ब्याटरलाई किन्नु पर्ने देखिन्छ । कोलकाताको टोलीमा कप्तान श्रेयस ऐर र नितिश राणालाई हेर्ने हो भने भरपर्दा ब्याटर देखिदैनन् । त्यसैले अक्सनमा भारतीय र विदेशी दुवै प्रमुख ब्याटर हेर्नुपर्ने हुन्छ । जुन ब्याटर कम मूल्यमा पाउन सक्नुपर्छ । जो रुट, टम ब्यान्टन, लिटन दास र फिलिप साल्ट मध्य एक राम्रो विकल्प हुनसक्छन् ।