काठमाडौं (हाम्रो खेलकुद) – स्टार स्पाइकर प्रतिभा मालीले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब लिगमा न्यु डायमन्ड युथ स्पोर्ट्स क्लबको कप्तानी गर्ने भएकी छिन् ।

न्यु डायमन्डकी नियमित कप्तान ललिता नाथले खेलाडी जीवनबाट विश्राम लिने निर्णय गरेसँगै प्रतिभाले टोलीको कप्तानी सम्हाल्ने जिम्मेवारी पाएकी हुन् । ललिता भने टोलीको सहायक प्रशिक्षकको रुपमा रहनेछिन् ।

न्यु डायमन्डले शनिबारदेखि सुरु हुने प्रतियोगिताको लागि टोली घोषणा पनि गरेको छ । कप्तान प्रतिभासँगै राष्ट्रिय टोलीका सलिना श्रेष्ठ, रिमा कुँवर र प्रगति नाथ पनि टोलीमा छन् । यसबाहेक वाल्मिका आचार्य, सुमित्रा रेग्मी, सलिना बुढा मगर र एन्जिला प्रधान पनि छन् ।

युवा खेलाडीहरु एलिसा मानन्धर, जेनिशा विश्वकर्मा, भावना तामाङ र निशा महर पनि १२ सदस्यीय टोलीमा अटाएका छन् । टोलीको मुख्य प्रशिक्षकमा कुमार राई छन् । सहायक प्रशिक्षकमा ललिता तथा व्यवस्थापकमा किरण कार्की नियमित छन् ।

प्रतियोगितामा क्लब च्याम्पियनसिपबाट छनोट भएका पुरुषतर्फ ७ टोली र महिलातर्फ ६ टोलीले प्रतिस्पर्धा गर्दैछन् । पुरुषमा त्रिभुवन आर्मी क्लब, नेपाल एपिएफ क्लब, नेपाल पुलिस क्लब, गण्डकी प्रदेश, टिप टप हेल्प नेपाल स्पोर्ट्स क्लब, शैलुंग बाग ढुंगा स्पोर्ट्स क्लब र दावाली मिलन क्लब रहेका छन् ।

महिलातर्फ नेपाल पुलिस क्लब, त्रिभुवन आर्मी क्लब, नेपाल एपिएफ क्लब, न्यु डायमन्ड युथ स्पोर्ट्स क्लब, गण्डकी प्रदेश र एभरेष्ट भलिबल क्लबले प्रतिस्पर्धा गर्नेछन् ।

प्रतियोगितामा दुवैतर्फको विजेता टोलीले ६ लाख, दोस्रो हुनेले ३ लाख, तेस्रो हुनेले १ लाख ५० हजार र चौथो हुने टोलीले ७५ हजार रुपैयाँ प्राप्त गर्नेछन् । व्यक्तिगत विधातर्फ सर्वोत्कृष्ट खेलाडीले समान ३५ हजार तथा उत्कृष्ट सर्भर, सेटर, ब्लकर, स्पाईकर, लिवेरो र प्रशिक्षकले जनही १५ हजार रुपैयाँ प्राप्त गर्नेछन् ।

न्यु डायमन्डको टोली :

प्रतिभा माली (कप्तान), सलिना श्रेष्ठ, रिमा कुँवर, प्रगति नाथ, वाल्मिका आचार्य, सुमित्रा रेग्मी, सलिना बुढा मगर, एन्जिला प्रधान, एलिसा मानन्धर, जेनिशा विश्वकर्मा, भावना तामाङ र निशा महर

अफिसियल : कुमार राई (प्रशिक्षक), ललिता नाथ (सहायक प्रशिक्षक), किरण कार्की (व्यवस्थापक)

यो पनि पढ्नुहोस : चम्कन नपाउँदै विश्राम लिएकी ‘डायमन्ड’ ललिता