काठमाडौं (हाम्रो खेलकुद) – रेश्मा भण्डारी वुमन अफ द म्याच प्रदर्शन गरेपछि शुक्रबार एपिएफले आयोजक ढोरपाटन स्पोर्टस क्लबलाई सोझो सेटमा हराउँदै १२ औं ढोरपाटन डबल लिग महिला भलिबल प्रतियोगिताको शीर्ष स्थान उक्लेको छ । एपिएफ २५–११, २५–१० र २५–८ को सोझो सेटमा विजयी भएको थियो । १३ खेलमा एपिएफको ३६ अंक पुगेको छ ।
रिड मोडल कलेज र न्यु डायमन्डबीचको खेल खराव प्रकाशका कारण रद्द भएपछि दुई खेल बढी खेलेको एपिएफ एक दिनका लागि भएपनि अगाडि भएको छ । उपाधि दाबेदार रिड मोडलको ११ खेलबाट ३३ अंक छ । तेस्रो स्थानको न्यु डायमन्डको १२ खेलमा ३० अंक छ ।
शुक्रबार नै पहिलो खेलमा भने त्रिभुवन आर्मीलाई २५–२२, २५–११ र २५–७ ले हरायो । न्यु डायमन्डको जितमा कप्तान ललिता नाथ वुमन अफ द म्याच घोषित भइन् । चौथो स्थानमा रहेको नेपाल पुलिसले पश्चिमाञ्चल क्षेत्रिय भलिबल संघलाई २६–२४, २१–२५, २५–१६ र २५–२३ ले हरायो । उक्त खेलमा पश्चिमाञ्चलकी अरुणा शाहीले वुमन अफ द डेको उपाधि जितिन् । उनलाई भिक्टोरिया इन्टरनेशनल होटल ट्रेनिङ इन्स्टिच्युटले निशुल्क ३ महिने होटल म्यानेजमेन्ट तालिमको अवसर प्रदान गरेको छ ।
पुलिसको १३ खेलमा २४ अंक छ । पश्चिमाञ्चल १३ खेलका साथ २१ अंक जोड्दै पाँचौं स्थानमा छ । त्यसैगरी विभागीय टोली आर्मीले १३ खेलबाट १५ अंक बटुलेको छ । दोस्रो चरणमा एउटा खेल जित्न नसकेको आयोजकको १३ खेलमा ८ अंक छ ।
