काठमाडौं (हाम्रो खेलकुद) – नेपाल एपिएफ क्लबले एक खेल बाँकी रहँदै १६ औं ढोरपाटन महिला डबल लिग भलिबलको उपाधि जितेको छ ।

आइतबार भएको लिगको ११ औं खेलमा एपिएफले निकै रोमान्चक खेलमा चन्द्रागिरी नगरपालिका न्यु डायमन्डलाई ३-१ ले पराजित गर्दै उपाधि पक्का गरेको हो । यससँगै क्लबले ५ लाख १ हजार रुपैयाँ पुरस्कार प्राप्त गर्ने पक्का भएको छ ।

ढोरपाटनको भलिबल कोर्टमा एपिएफले सुरुवाती दुई सेट २५-१५ र २५-१८ ले सुरुवाती दुई सेट जितेको थियो । तेस्रो सेटमा न्यु डायमन्डले २६-२४ को जितका साथ खेलमा फर्कने संकेत दियो । तर चौथो सेट २५-१९ ले जितेसँगै एपिएफ च्याम्पियन बनेको हो ।

आइतबार नै पुलिसले पहिलो खेलमा धादिंग स्पोर्ट्स क्लबलाई २५-१४, २५-९, २५-१६ ले हरायो । दोस्रो खेलमा त्रिभुवन आर्मी क्लबले एन्जल हार्टमाथि २५-२, २५-६, २५-८ को एकपक्षीय जित निकाल्यो ।

आर्मी र पुलिसबीच भएको दिनको अन्तिम खेल चौथो सेटमा २-२ को स्थिति भएपछि खराब प्रकाशका कारण रोकिएको छ । आयोजकले उक्त खेल कहिले हुने स्पष्ट पारिसकेको छैन ।

अंक तालिकामा एपिएफको ११ खेलमा ३२ अंक छ । एपिएफले पहिलो चरणमा न्यु डायमन्डविरुद्ध पाँचौ सेटमा जित हासिल गर्दा एकमात्र अंक गुमाएको थियो । डायमन्डको ११ खेलमा २४ अंक छ । आर्मीको १० खेलमा २२ र पुलिसको १० खेलमा २१ अंक छ ।

एन्जल हार्टले सबै १२ खेलमा १२ अंक तथा धादिंगले १२ खेलमै ६ अंक जोड्यो । जावलाखेल ७ खेलमा ३ र बागमती विना कुनै अंक पहिलो चरणबाट बाहिरिएका थिए ।

अब अन्तिम दिन सोमबार पुलिसले न्यु डायमन्ड र च्याम्पियन एपिएफले आर्मीसँग खेल्ने तालिका रहेको छ ।