सुमन अधिकारी,बुटवल

तीन विभागिय टोली र गण्डकी प्रदेश रुपन्देहीको तिलोत्तमामा जारी नवौं मणिमुकुन्द कप राष्ट्रियस्तर पुरुष भलिबल प्रतियोगिताको सेमिफाइनलमा प्रवेश गरेका छन् ।

नेपाल पुलिस क्लब सोमबार नै अन्तिम चारमा पुगिसकेको थियो भने त्रिभुवन आर्मी क्लब, नेपाल एपिएफ क्लब र गण्डकी मंगलबारको खेल जित्दै सेमिफाइनलमा पुगेका हुन् ।

समुह ए बाट पुलिस विजेता र आर्मी उपविजेताका रुपमा अन्तिम चारमा पुगेका हुन् । समूह बीबाट एपिएफ विजेता र गण्डकी उपविजेताका रुपमा सेमिफाइनलमा पुगेका हुन् । बुधबार हुने सेमिफाइनलमा पुलिसले गण्डकी र आर्मीले एपिएफको सामना गर्नेछ । फाइनल फागुन बिहीबार हुनेछ ।

अघिल्लो दिननै सेमिफाइनल पुगेको पुलिसले बुधबार कोशी प्रदेशलाई २५–१७, २५–१३ र २५–१५ को सोझो सेटमा हराउँदै समूह विजेता बनेको हो । एपिएफ बागमती प्रदेशलाई २५–१८, १८–२५, २५–१९, र २५–१९ ले हराउँदै समुह बीको विजेताका रुपमा सेमिफाइनल पुगेको थियो ।

आर्मी सुदूरपश्चिम प्रदेशलाई ३–० ले हराउँदै समूह एको उपविजेता बनेको हो । आर्मीले सुदूरपश्चिमलाई २५–१५, २५–१९ र २५–१९ ले पराजित गर्यो । गण्डकीले लुम्बिनीलाई २५–१७, २५–१८ र २५–२२ को सोझो सेटमा पराजित गर्दै समूह बीको उपविजेता बनेको थियो ।

प्रदेश खेलकुद परिषद, लुम्बिनीको मुख्य प्रायोजन, नेपाल भलिबल संघको संयोजन तथा मणिमुकुन्द भलिबल क्लब, रुपन्देहीको आयोजनामा जारी प्रतियोगिताको विजेताले २ लाख , दोस्रोले र १ लाख ५०, तेस्रोले १ लाख र चौथो टोलीले ५० हजार रुपैयाँ प्राप्त गर्नेछन्। । सर्वोत्कृष्ट खेलाडीले १० हजार र विधागत उत्कृष्ट खेलाडी र प्रशिक्षकले जनही ५ हजार रुपैयाँ प्राप्त गर्नेछन्।