काठमाडौं (हाम्रो खेलकुद)- काभ्रेपलाञ्चोकको बनेपामा जारी दोस्रो उपमेयर कप खुल्ला तथा आमन्त्रण महिला भलिबल प्रतियोगिता दोस्रो दिन मंगलवार टिप‌ टप न्यु डायमण्ड स्पोर्टस क्लब विजयी भएको छ।

बनेपाको लायकु मञ्चमा रहेको भलिबल कोर्टमा भएको मंगलवारको खेलमा समूह खमा न्यु डायमण्डले धुलिखेल नगरपालिकालाई ३-० को सोझो सेटमा पराजित गर्यो । न्यु डायमण्ड समूह विजेता र धुलिखेल उपविजेताका रुपमा क्वाटरफाइनलमा पुगेका छन्।

अर्को खेलमा बनेपा नगरपालिकाले पनौती नगरपालिकालाई ३-१ ले पराजित गर्यो । लगातार दुई हारमा पनौती प्रतियोगिताबाट बाहिरिएको छ।

पहिलो दिन पनौतीलाई हराएको प्रोफेसनल एजुकेसन कन्सल्टेन्सीले बनेपालाई ३-०ले हराएको छ। समूह घबाट प्रोफेसनल विजेता र बनेपा उपविजेताका रुपमा अन्तिम आठमा पुगेका‌ छन् ।

समूह गमा बुढानिलकण्ठ भलिबल क्लबले बनेपा ९ लाई ३-० ले हराएको छ। बुढानिलकण्ठ विजेता र बनेपा ९ उपविजेताका रुपमा क्वाटरफाइनलमा पुगे ।

पहिलो दिन समूह कबाट ललितपुर उपमहानगरपालिका विजेता र महाभारत गाउँपालिका उपविजेताका रुपमा अन्तिम आठमा पुगेका‌ थिए।

बनेपा नगरपालिकाको आयोजना भएको प्रतियोगिताको व्यवस्थापनको बनेपा भलिबल प्रशिक्षण केन्द्रले गरेको छ। काभ्रे जिल्ला भलिबल संघको सहकार्यमा भएको प्रतियोगितामा ९ वटा टोलीले भाग लिएका छन् ।

प्रतियोगिताको‌‌ विजेताले ट्रफीसहित १ लाख, दोस्रो ५० हजार, तेश्रोले २५ हजार र चौथोले १० हजार रुपैयाँ प्राप्त गर्नेछ । चैत ३० गते सम्म चल्ने प्रतियोगितामा बुधवार क्वाटरफाइनलमा खेल हुनेछन् ।