काठमाडौं (हाम्रो खेलकुद) – नम्बर एक व्यवसायिक गल्फर शिवराम श्रेष्ठले सूर्य नेपाल सेन्ट्रल ओपन गल्फ प्रतियोगिताको उपाधि जितेका छन् । पहिलो दिनबाटै गोकर्ण फरेस्ट गल्फ रिसोर्टमा अग्रता बनाएका शिवरामले २२ अन्डर २ सय ६६ को प्रदर्शनसहित उपाधि जितेका हुन् । अन्तिम दिन बिहीबार भएको फाइनल राउन्डमा उनले १ अन्डर ७१ को कार्ड बनाएका थिए । शिवरामको यो खेल जीवनको ३८ औं गल्फ उपाधि हो । उनले उपाधिसहित १ लाख १५ हजार रुपैयाँ जिते ।

प्रतियोगितामा सूर्यप्रसाद शर्मा र सञ्जय लामा संयुक्त रूपमा दोस्रो भए । दुवै जनाले दुई अन्डर दुई सय ८६ खेलेका थिए । फाइनल राउन्डमा सूर्यले ४ ओभर ७६ र सञ्जयले इभन पार ७२ खेले । दुवैले जनही ६३ हजार पाँच सय रुपैयाँ प¥यो । २ ओभर दुई सय ९० खेलेका राम मगर चौथो भए । उनले फाइनलमा एक अन्डर ७१ खेलेका थिए ।

यसैगरी समग्रमा ३ ओभर २ सय ९४ खेलेका दीपक मगर पाँचौं तथा २ सय ९६ खेलेका भुवन नगरकोटी र जयराम श्रेष्ठ संयुक्त रूपमा सातौं भए । धनबहादुर थापा, भुबहादुर गुरुङ र पशुपति शर्मा शीर्ष १० मा अटाए । कुल ६ लाख ३० हजार रुपैयाँ पुरस्कार राशि रहेको उक्त प्रतियोगिताको फाइनलमा पुगेका २१ जना प्रोले नगद पुरस्कार प्राप्त गरे ।

यसैगरी एमेच्योरतर्फको उपाधि फुन्सोक नोर्बु लामाले जिते । लामाले कुल २५ ओभर ३ सय १३ खेलेका थिए । तीन सय १७ खेलेका सुनिल केसी दोस्रो भए । सूर्य नेपालको मुख्य प्रायोजन तथा नेपाल प्रोफेसनल गल्फर एसोसिएसनको आयोजनामा चारदिने प्रतियोगितामा प्रोतर्फ ३२ र एमेच्योरका १० जना खेलाडीले भाग लिएका थिए ।

३६ होलपछि २१ प्रो र ६ एमेच्योर ३६ होलको फाइनल खेलका लागि छानिएका थिए । सूर्य नेपाल प्रालिका मार्केटिङ म्यानेजर बालकृष्णा गुरुङ र नेपाल प्रोफेसनल गल्फर्स एसोसिएसनका सल्लाहकार घनश्याम थापाले पुरस्कार वितरण गरे ।