काठमाडौं (हाम्रो खेलकुद) – नेपाल भलिबल संघको आयोजना र राष्ट्रिय वाणिज्य बैंकको प्रायोजनमा चौथो राष्ट्रिय पुरूष क्लब लिग भलिबल प्रतियोगिताको पुस १ गतेबाट पोखरामा हुने भएको छ ।

चौथो राष्ट्रिय क्लब च्याम्पियनसिपबाट छनोट भएका क्लबले लिगमा प्रतिस्पर्धा गर्नेछन् । प्रतियोगितामा नेपाल पुलिस क्लब, त्रिभुवन आर्मी क्लब र एपिएफसँगै बुटवलको मणिमुकुन्द भलिबल क्लब, जावलाखेल भलिबल तालिम केन्द्र, ढोरपाटन तालीम केन्द्र, हेल्प नेपाल स्पोर्टस् क्लब र नयाँबजार युवा क्लब सहभागी रहने छन् । पोखरा रंगशालामा पुस ७ गतेसम्म हुने प्रतियोगिता राउन्ड रोबिन लिग प्रणालीमा हुनेछ । यद्यपी लिग चरणको शीर्ष स्थानमा रहने टोलीलाई विजेता मान्ने वा फाइनल खेलाउने भन्न्व विषयमा निर्णय भएको छैन ।

गतवर्ष राष्ट्रिय वाणिज्य बैंकले महिला र पुरुषको लागि २० लाख रुपैयाँ प्रायोजन सम्झौता गर्ने सम्झौता गरेको थियो । महिला लिग भलिबल जेठमा सम्पन्न भइसकेको छ । पुरूष टोली एसियाली खेलकुदको तयारीका लागि महेन्द्रनगरमा रहेको हुनाले मिति सारिएको थियो ।

प्रतियोगिताको विजेताले २ लाख, उपविजेताले १ लाख पाउनेछन् भने तेस्रो र चौथो हुनेले ५० र २५ हजार रूपैयाँ प्राप्त गर्नेछन् । त्यस्तै व्यक्तिगत विधातर्फ उत्कृष्ट लिबेरो, सर्भर, ब्लकर, लिफ्टर, स्पाइकर र प्रशिक्षकले ५-५ हजार रूपैयाँ पाउनेछन् ।