काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) को प्रतिक्षित खेलमा आज सुदूरपश्चिम रोयल्स र विराटनगर किंग्सबीच खेल हुँदैछ।

टस जितेेर विराटनगरका कप्तान सन्दीप लामिछाने फिल्डिङ रोजेको छ। सुदूरपश्चिमले पहिला ब्याटिङ गर्ने छ।

सुदूरपश्चिम जारी एनपिएलमा अपराजित एक मात्र टोली हो। जसले लगातार छैटौं खेल जितेर एक खेल अगाडि नै क्वालिफायर वानमा स्थान सुरक्षित गरिसकेको छ।

गत संस्करणको फाइनलिष्ट सुदूरपश्चिम उच्च फर्ममा छ। यो पटक उसको विदेशी र नेपाली खेलाडीको कम्बिनेसन उत्कृष्ट छ।

कप्तान दीपेन्द्र सिंह ऐरीको कप्तानी र प्रदर्शन प्रभावशाली रहेको छ। क्वालिफायर वानमा पुगिसकेको कारण आजको नतिजाले सुदूरपश्चिमलाई खास असर गर्दैन। तर जितको मोमेन्टमलाई कायमै राख्दै सुदूरपश्चिम अगाडि बढ्न चाहन्छ।

यही अपराजित टिमलाई हराउँदै विराटनगर पनि क्वालिफायर वानमा प्रवेश गर्न चाहन्छ। ७ खेल खेलिसकेको काठमाडौंसँग १० अंक रहेको छ। विराटनगर हारेको खण्डमा काठमाडौं क्वालिफायरमा पुग्नेछ। जितले भने विराटनगरको संभावना रहनेछ। विराटनगरले खेल जिते दुवै टोलीको समान १० अंक हुनेछ। रन रेटको आधारमा एक टिम क्वालिफायर वानमा पुग्नेछ।

विराटनगरले खेलेको ६ खेलमा २ मा हार र ४ मा जित निकालेको छ। उसको ८ अंक छ। पछिल्लो खेलमा दक्षिण अफ्रिकाका पूर्व कप्तान फाफ डु प्लेसिसको ब्याटिङको‌ जादु चल्न सकेन। आज उनको प्रदर्शन प्रमुख रहन सक्छ।

आज हुने दोस्रो खेलमा चितवन राइनोज र पोखरा एभेन्जर्सबीच हुनेछ। दुवै टोली लिग चरणबाट बाहिरिसकेका छन् ।