काठमाडौं (हाम्रो खेलकुद) – १४औं संस्करणको रेडबुल ढोरपाटन सुजुकी महिला डबल लिग भलिबल माघ पहिलो साताबाट हुने भएको छ । आयोजक ढोरपाटन क्लबले शुक्रबार राजधानीमा पत्रकार सम्मेलनको आयोजना गर्दै १४औं संस्करणको ढोरपाटन भलिबल लिग माघ ५ गते देखि १९ गतेसम्म हुने जानकारी गरायो ।

प्रतियोगितामा ११ टोलीले सहभागिता जनाउने आयोजकले जनाएको छ । एपिएफ क्लब, न्यु डायमण्ड एकेडेमी, नेपाल पुलिस क्लब, टप्स स्कुल पोखरा, चितवन टाइगर्स, थ्री स्टार एकेडेमी, पारामाउण्ट एकेडेमी, सेव स्कुल र थाहा नगरपालिका मकवानपुरको सहभागिता रहने आयोजक तथा ढोरपाटन भलिबल क्लबका अध्यक्ष मनविर छन्त्यालले जानकारी दिए ।

सेव स्कुल, थाहा नगरपालिका मकवानपुर र चितवन टाइगर्स प्रतियोगिताको नयाँ टोली हुन् । दोस्रो चरणमा आठ टोलीले स्थान बनाउनेछन् । यि टोलीहरुबाट धेरै अंक हात पार्ने टोली लिगको च्याम्पियन बन्नेछ ।

पोखराको ज्ञानुबाबा स्कुल र विभागीय नेपाल एपिएफ क्लब प्रतियोगिताको सर्वाधिक सफल टोली टोली यि दुई टोलीले समान ५–५ पटक उपाधि जितेका छन् । ज्ञानुबावा दोस्रो देखि छैटौ संस्करण सम्म च्याम्पियन बनेको थियो । त्यसपछि सातौमा पुलिस च्याम्पियन बनेको थियो ।

त्यसपछि ११औं संस्करण सम्म एपिएफ च्याम्पियन बन्दा १२औं संस्करणमा भारतीय खेलाडी सम्मिलित रिड मोडल च्याम्पियन बनेको थियो । १३औंमा फेरि एपिएफ नै च्याम्पियन बनेको थियो । नेपाल पुलिस क्लब र रिड मोडल स्कुलले समान एक पटक उपाधि जितेका छन् । पहिलो संस्करणमा भने पुरुषको प्रतिस्पर्धा भएको थियो । जसमा आर्मीले बाजी मारेको थियो ।

यसपटक पुरस्कार राशिमा २५ हजारका दरले वृद्धि गरिएको आयोजकले जनाएको छ । प्रतियोगिताको विजेताले यसपटक ३ लाख ५० हजार पाउनेछ । गतवर्ष ३ लाख २५ हजार पाएको थियो । दोस्रो हुने टोलीले दुई लाख प्राप्त गर्ने छ । त्यस्तै तेस्रो हुनेले १ लाख, चौथो हुने टोलीले ६० हजार, पाँचौ हुनेले ४० हजार, छैठौं हुनेले ३० हारजार र सातौं हुने टोलीले २० हजार नगद पुरस्कार प्राप्त गर्नेछन् ।

व्यक्तिगत विधातर्फ उत्कृष्ट खेलाडी, उदयमान खेलाडी, बर्ष खेलाडी, प्लेयर अफ दि सिरिज र एक जना भाग्यमानि दर्शकले १–१ थान सुजुकी स्कुटर पाउने छन् । त्यस्तै उत्कृष्ट स्पाइकर, उत्कृष्ट डिफेन्डर, उत्कृष्ट ब्लकर, उत्कृष्ट सर्भर, उत्कृष्ट सेटर र उत्कृष्ट प्रशिक्षकले समान ६–६ हजार नगत प्रप्त गर्ने आयोजकले जानकारी दिए । प्रतियोगितामा ५० लाख लाग्ने अनुमान गरिएको छ ।

नेपाल भलिबल संघका अध्यक्ष मनोरन्जनरमण शर्माले ढोरपाटन क्लब र संघ हातमा हात र साथमा साथ मिलाएर अघि बढिरहेको बताए । यस्तै संघका महासचिव जितेन्द्र बहादुर चन्दले अब धेरै प्रतियोगिता भन्दा पनि गुणस्तरीय प्रतियोगितामा जोड दिनुपर्ने बताए ।

भिजी अटोमोवाइलसँग सह–प्रायोजन सम्झौता
यसैबीच महिला भलिबल लिग आयोजक ढोरपाटन क्लबले सह–प्रायोजनको रुपमा भिजी अटोमोवाइल प्रालि अन्तरगतको सुजुकीको साथ पाएको छ । ढोरपाटनले शुक्रबार सुजुकीसँग तीन वर्षको लागि सह–प्रायोजन गरेको छ ।

प्रायोजन सम्झौतामा क्लबका अध्यक्ष मनवीर छन्त्याल र सुजुकीका मार्केटिङ म्यानेजर नवराज कोईरालाले हस्ताक्षतर गरे । सम्झौतामा प्रत्येक भिजी सुजुकीको स्कुटर खरिदमा ५० हजार छुट हुनेछ ।