पोखरा (हाम्रो खेलकुद) – उपाधिको दावेदार विभागीय नेपाल पुलिस क्लबले पोखरामा जारी चौथो आरबीबी एनभीए राष्ट्रिय पुरुष क्लब लिग भलिबल प्रतियोगितामा दोहोरो जित निकालेको छ ।
पोखरास्थित पोखरा रंगशालाको भलिबल कोर्टमा सोमबार भएको खेलमा पुलिसले जावलाखेल भलिबल प्रशिक्षण केन्द्र र नयाँ बजार क्लबलाई पराजित गर्दै दोहोरो जित निकालेको हो । दिनको पहिलो खेलमा पुलिसले जावलाखेलमाथि २५–२१, २५–१४ र २५–१८ को सोझो सेटमा जित दर्ता गर्दा नयाँ बजारमाथि ३–१ को जित निकाल्यो । सुरुवाती २ सेट २५–२२ र २५–२१ ले आफ्नो पक्षमा पारेको पुलिसले तेस्रो सेट १९–२५ ले गुमाएको थियो । चौथो सेट २५–१३ ले सहजै जित हात पार्यो ।
यस्तै विभागीय त्रिभुवन आर्मी क्लबले ढोरपाटन स्पोर्टस् क्लबलाई ३–० को सोझो सेटमा पराजित गर्दै लिगमा दोस्रो जित निकाल्न सफल भयो । आर्मीले ढोरपाटनमाथि २५–१९, २५–१७ र २५–१२ ले पराजित गरेको हो । एपीएफले रुपन्देहीको मणिमुकुन्द भलिबल क्लबलाई २५–१८, २५–१५ र २५–१७ को सोझो सेटमा पराजित गर्यो ।
सोमबारै हेल्प नेपाल स्पोर्टस् क्लबले नयाँबजार स्पोर्टस क्लबमाथि ३–२ को कठिन जित निकाल्यो । हेल्प नेपालले पहिलो सेट २२–२५ ले गुमाएको थियो । दोस्रो सेटमा २५–२१ को जित निकालेपछि तेस्रो सेटमा २५–२० ले विजयी रहयो । तर हेल्प नेपलले चौथो सेट १६–२५ ले गुमाएपछि खेल २–२ को बराबरीमा पुगेको थियो । निर्णायक सेटमा हेल्प नेपालले १५–११ को जित निकाल्यो ।
प्रतियोगिताको दोस्रो दिनको खेल सकिदा पुलिस ३ खेलबाट ९ अंक जोडेर लिगको शीर्ष स्थानमा छ । ६ अंक जोडेको आर्मी र एफिएफ दोस्रो र तेस्रो स्थानमा छ । नयाँ बजारसँग १ एक गुमाएको हेल्प नेपाल ५ अंक जोडेर चौथो स्थानमा छ । प्रतियोगिता अन्तर्गत मंगलबार चार खेल हुनेछ । दिनको पहिलो खेलमा मणिमुकुन्दले ढोरपाटन, हेल्प नेपालले नेपाल पुलिस, त्रिभुवन आर्मी क्लबले एपिएफ र मणिमुकुन्दले नयाँबजारसँग खेल्नेछ ।
