काठमाडौं (हाम्रो खेलकुद) – नेपाल पुलिस क्लबकी दिवान शर्मा तेस्रो वीर गणेशमान राष्ट्रिय बक्सिङ प्रतियोगिता २०७५ को क्वार्टरफाइनलमा पुगेका छिन् । मंगलबार वसन्तपुर डबलीमा भएको प्रतियोगिताको पहिलो दिनको खेलमा पुलिसकी दिवानले प्रदेश ४ की आकृति गुरुङलाई पहिलो राउण्डमा नै पराजित गरिन् ।
त्यसअघि प्रतियोगिताको पहिलो खेलमा पुरुष ४९ केजीमा प्रदेश २ का पवन श्रेष्ठले प्रदेश १ का धर्मेन्द्र राईलाई हराए । सोहि तौल समूहमा त्रिभुवन आर्मी क्लबका सुशील थापाले प्रदेश ४ का सुरज गुरुङलाई पराजित गरे । पुरुष ५६ केजी तौल समूहमा प्रदेश १ का सुरेन्द्र राईले प्रदेश ४ का दुथबहादुर परियारलाई पहिलो राउण्डमा नै पाखा लगाए । पहिलो राउण्डमै सुरेन्द्रले जोडदार प्रहार गर्दा दुथबहादुर घाइते भएका थिए ।
महिलातर्फ ४६ देखि ४८ केजी तौल समूहमा प्रदेश ५ कि सुशिला थापाले प्रदेश २ कि सपना गुरुङलाई हराइन् । पुरुष ६० केजी तौल समूहमा प्रदेश ३ का सनिल शाहीले प्रदेश ६ का सागर श्रेष्ठलाई पहिलो राउण्डमा हराए । प्रदेश ७ का भरत चन्दले प्रदेश १ का तोविन प्रधानलाई पराजित गरे ।
दिनको अन्तिम खेलमा पुरुष ६४ केजीतर्फ प्रदेश २ का किशोर शर्माले प्रदेश ७ का विक्रम चौधरीलाई हराए । पहिलो दिनका सबै विजेता खेलाडीले क्वार्टरफाइनलमा स्थान सुरक्षित गरे ।
त्यसअघि उद्घाटन समारोहमा बक्सिङका पूर्वखेलाडी एवं प्रशिक्षक सुरेश आलेमगरलाई फाउन्डेसनले १ लाख १ हजार नगदसहिद सम्मान गर्यो । उनलाई कार्यक्रमका प्रमुख अतिथि गणेशमान सिंह फाउन्डेसनका अध्यक्ष प्रकाशमान सिंहले प्रशंसा पत्रसहित सम्मान गरे । माघ २६ सम्म चल्ने प्रतियोगितामा ७ प्रदेशबाट छनोट भएका उत्कृष्ट खेलाडीहरु प्रतिस्पर्धा गरिरहेका छन् ।
