काठमाडौं (हाम्रो खेलकुद) – राष्ट्रिय फुटबल टोलीका पूर्व कप्तान अनिल गुरुङले रुस्लान थ्री स्टार क्लबका लागि सिजनको पहिलो गोल गरेका छन् ।
पोखरामा जारी १७औं संस्करणको आहा रारा गोल्डकबप फुटबल प्रतियोगिता अन्तरगतको सिक्किम युनाइटेडविरुद्धको खेलमा गोल गरेसँगै अनिलले सिजनको पहिलो गोल गरेका हुन् । उनले खेलको २४औं मिनेटमा गोल गरेका थिए ।
सिक्किमका खेलाडीले सुशिल राईलाई फल गरेपछि थ्री स्टारले पेनाल्टीको मौका पाएको थियो । जसलाई अनिलले सदुपयोग गरेका हुन् । घरेलु फुटबलको अर्को चर्चित क्लब सिग्नेचर मनाङ मस्र्याङ्दी क्लबमा झन्डै एक दशक बिताएका अनिल यहि सिजनको सुरुवातमा थ्री स्टार पुगेका थिए ।
थ्री स्टारमा अनुबन्ध भएसँगै अनिलले ‘ए’ डिभिजन लिग, मोफसलको विभिन्न प्रतियोगिता तथा यसै साता भुटानमा भएको जिग्मेसिग्मे वाङचुक गोल्डकप प्रतियोगितामा खेलेपनि गोल गर्न भने सकेका थिएनन् ।
