काठमाडौं (हाम्रो खेलकुद) – विभागीय डर्बीमा त्रिभुवन आर्मी क्लबमाथि संघर्षपूर्ण जित दर्ता गरेपछि एपीएफ पाँचौं केएनपी राष्ट्रिय महिला भलिबल प्रतियोगिताको सेमिफाईनलको समूह विजेताको रुपमा प्रवेश गरेको छ ।

लगनखेलस्थित आर्मी प्रशिक्षण केन्द्रको कभर्ड हलमा एपीएफले आर्मीलाई पाँचौ सेटमा पराजित गर्यो । पहिलो सेट २५-१४ ले जितेको एपीएफले दोस्रो सेट २२-२५ ले गुमाएको थियो । तेस्रो सेटमा २५-२३ को जित दर्ता गरेपनि आर्मीले चौथो सेट २५-२० ले जित्दै खेललाई पाँचौ सेटसम्म पुर्यायो । पाँचौ सेटमा पनि १३-१० को अग्रता लिएको आर्मीले त्यसपछि लगातार अंक गुमाएपछि एपीएफ १५-१३ ले जित दर्ता गर्न सफल रहयो । एपीएफकी सरस्वती चौधरी वुमन अफ दि म्याच बन्दै ५ हजार रुपैयाँ प्राप्त गरिन् ।

त्यस्तै दिनको दोस्रो खेलमा समूह बीको पुलिसले पश्चिमाञ्चललाई २५–१६,२५–८ र २५–२२ को सोझो सेटमा हराउदै समूह विजेता बन्यो । उक्त समूहबाट होंगान्जी न्यू डायमन्ड अघिल्लो दिन नै एक जित र एक हारसहित सेमिफाइनल पुगेको छ । अर्को खेलमा एपीएफले जाउलाखेल भलिबल प्रशिक्षण केन्द्रलाई २५–५,२५–१२ र २५–१३ को सोझो सेटमा हरायो ।

सोमबार हुने पहिलो सेमिफाईनल एपीएफ र होङगान्जी न्यू डायमण्डबीच हुनेछ भने दोश्रो सेमिफाइनलमा पुलिस र आर्मीबीच प्रतिस्पर्धा हुने पक्का भएको छ ।

शेरवहादुर खड्का स्मृति प्रतिष्ठानको आयोजनामा संचालन भएको प्रतियोगिताका बिजेताले २ लाख,उपबिजेताले १ लाख,तृतिय हुने टिमले ५० हजार नगद प्राप्त गर्ने छन् । प्रतियोगिताको सर्वोेकृष्ट खेलाडी र शेरवहादुर खड्का स्पेशल अवार्ड बिजेताले जनही १५-१५ हजार प्राप्त गर्ने छन् । बिद्यागततर्फ वेष्ट स्पाईकर, वेष्ट सेटर,बेष्ट ब्लक,बेष्ट डिफेन्स,बेष्ट क्विकर,बेष्ट सर्भर र बेष्ट कोचले जनहि ७ हजार नगद प्राप्त गर्ने छन् । हरेक खेलका प्लेयर अफ द म्याच ले ५ हजार रुपैयाँ प्राप्त गर्नेछन् ।