काठमाडौं (हाम्रो खेलकुद) – बाबु शेर्पाले टर्किस एअरलाइन्स गल्फ विश्वकपको काठमाडौं छनोटको उपाधि जितेका छन् ।
शनिबार गोकर्ण गल्फ रिसोर्टमा शेर्पाले काउन्ट ब्याकका आधारमा ओला तेन्जिङलाई पछाडी पार्दै विश्वकपका लागि छनोट भएका हुन् । शेर्पाले नोभेम्बरमा टर्कीमा हुने टर्किस एअरलाइन्स विश्वकप गल्फमा नेपालको प्रतिनिधित्व गर्नेछन् ।
शेर्पा र तेन्जिङ दुवैले ४२ अंक जोडेका थिए । काउन्टब्याकमा १० ह्यान्डीक्यापका शेर्पाले ब्याक नांमा २३ तथा १५ ह्यान्डीक्यापका तेन्जिङले १८ अंक जोडेका थिए । तेन्जिङ प्रतियोगिताको उपविजेता भए । टासी छिरिङले ग्रसतर्फ उपाधि जिते । उनले ३८ ग्रस अंक जोडेका थिए । उलाई स्वर्गीय आङ छिरिङ शेर्पाको स्मृतिमा विशेष ट्रफी पनि प्रदान गरियो ।
पेम्बा शेर्पाले तेस्रो स्थान हासिल गरे । उनले ४१ अंक जोड्दै अन्य दुई खेलाडीसँग अंक बराबरी भएपनि काउन्ट ब्याकको आधारमा तेस्रो स्थान हासिल गरे । रजत राना र केएनएस थापाले पनि समान ४१ अंक जोडेका थिए ।
महिलातर्फ कश्मिरा शाहले ३९ अंक जोड्दै पहिलो स्थान हासिल गरिन् । रेखा घिमिरे ३१ अंक जोड्दै काउन्टब्याकको आधारमा दोस्रो भइन् । कल्याणी मोक्तानले ३१ अंक जोडेपनि उनले ब्याक नाइनमा १४ र रेखाले १५ अंक जोडेकी थिइन् ।
मिथुन राईले पुरुषतर्फ क्लोजेस्ट टु द पिन र रेखा घिमिरेले महिलातर्फ उक्त अवार्ड जितिन् ।
टर्किस एअरलाइन्सका प्रबन्ध निर्देशक अब्दुल्लाह तुन्चेर केसेसी, सेल्स म्यानेजर बेनजिर श्रेष्ठ तथा गोकर्ण गल्फ क्लबका कप्तान जोसेफ नाथनले विजयी गल्फरलाई पुरस्कृत गरे । ६ महिलासहित कुल १ सय १ गल्फरको सहभागिता रहेको प्रतियोगिता स्टेबलफोर्ड फर्म्याटमा अधिकतम १८ ह्यान्डीक्याप राखेर खेलाइएको थियो ।
