काठमाडौं (हाम्रो खेलकुद) – नवौं संस्करणको ‘कान्तिपुर हाफ म्याराथन’ जेठ दोस्रो साता आयोजना हुने भएको छ । आयोजक कान्तिपुर मिडिया ग्रुपले बुधबार राजधानीमा पत्रकार सम्मेलनको आयोजना गर्दै नवौं संस्करणको म्याराथन जेठ ११ गते शनिबार हुने जानकारी गराए ।

पब्लिकेसन्सकै वार्षिकोत्सवको अवसरमा आयोजना गरिने भएपनि गत वर्षदेखि यसलाई छुट्टै विधाको रुपमा अघि बढाउने उद्देश्यले फरक दिनमा गतवर्षदेखि फरक मितिमा आयोजना गर्दै आएको पब्लिकेसनका सहायक महाप्रबन्धक महेश स्वाँरले जानकारी बताए । नेपाल एथलेटिक्स सघंको प्राविधिक सहयोगमा हुने हाफ म्याराथन (२१.१ किलोमिटर), ३ किमिको ह्विल चेयर दौड र ५ किमिको कर्पोरेट–मिडिया दौड हुनेछ । सबै विधामा गरी करिव ३५ सयले भाग लिने आयोजकले दावी गरेको छ ।

हाफ म्याराथनतर्फ महिला र पुरुष दुवै स्पर्धाका विजेताले हिरोको डुएट स्कुटरसहति समान ५० हजार रुपैयाँ प्राप्त गर्नेछन् । दोस्रो हुनेले समान ३० हजार र तेस्रो हुनेले समान २० हजार प्राप्त गर्नेछन् । यस्तै चौथो, पाँचौ र छैटौंले क्रमशः १०, ५ र ३ हजार प्राप्त गर्नेछन् ।

हाफ म्याराथन कान्तिपुर पब्लिकेसन थापाथलीबाट सुरु भई माइतीघर, बबरमहल, नयाँ बानेश्वर, तिनकुने, कोटेश्वर, जडीबुटी, गट्ठाघर, सानोठिमी हुँदै सल्लाघारी चोक पुगेर सोही रुट फिर्ता हुदै कान्तिपुर पब्लिकेसनमा आएर सकिने छ ।

ह्विल चेयरतर्फको महिला र पुरुष विजेताले समान २० हजार, दोस्रो हुनेले समान १० हजार र तेस्रो हुनेले समान ५ हजार प्राप्त गर्नेछन् । ह्विल चेयर दौड कान्तिपुर पब्लिकेसन थापाथलीबाट सुरु भई माइतीघर मण्डला घुमेर पुन कान्तिपुर पब्लिकेशन आएर सकिने छ ।

कर्पोरेट–मिडियातर्फको विजेताले बैंककमा ३ रात र ३ दिनको तथा घुम्ने प्याकेज पाउनेछ । दोस्रो हुनेले पोखरामा २ रात ३ दिनको घुम्ने प्याकेज पाउनेछ । तेस्रोले माउन्टेन फ्लाइटको टिकट प्राप्त गर्नेछन् ।
कर्पोरेट–मिडिया दौड कान्तिपुर पब्लिकेसन थापाथलीबाट सुरु भई माइतीघर, बबरमहल, नयाँ बानेश्वर हुँदै सिभिल हस्पिटल पुगेर पुन त्यहिँ बाटो फर्केर कान्तिपुर पब्लिकेशन थापाथली आएर टुंगिने छ ।

पब्लिकेसनका सहायक महाप्रबन्धक महेश स्वाँरले कान्तिपुर हाफ म्याराथनलाई अन्तर्राष्ट्रिय स्तरको दौड बनाउने लक्ष्य रहेको र त्यसका लागि एथलेटिक्स संघसँग छलफल अघि बढिरहेको जानकारी दिए ।
एथलेटिक्सका मुख्य प्रशिक्षक विक्रम जंग थापाले अन्तर्राष्ट्रिय मापदण्ड अनुसार प्रतियोगिता हुने र दुरी पनि सोही अनुसार तय गरिएको बताए ।

प्रदुषणविरुद्ध चेतना फैलाउने मुख्य नारा बोकेको म्याराथनलाई सिटिजन्स बैंकले मुख्य प्रायोजन गरेको छ । नेपाल लाइफ इन्स्योरेन्स, हिरो मोटरसाइकल, सिदार्थ बैंक, नेपाल एसविआई बैंक, एभरेस्ट बैंक र सुमेररु अस्पताल लगायतको साथ रहेको छ ।

कान्तिपुर हाफ म्याराथनका हालसम्मका सम्मका विजेताहरु:
२०६७– अर्जुन कुमार बस्नेत/कान्छीमाया कोँजु
२०६८– हरि कुमार रिमाल/बृन्दा श्रेष्ठ
२०६९– कल्याण बाँनिया/कान्छीमाया कोँजु
२०७०– अनिष थापामगर/कान्छीमाया कोँजु
२०७१– हरि कुमार रिमाल/विश्वरुपा बुढा
२०७२– गोपीचन्द्र पार्की/रेशु बस्नेत
२०७३– हरि कुमार रिमाल/कान्छीमाया कोँजु
२०७४/०७५ – हरि कुमार रिमाल/कान्छीमाया कोँजु