काठमाडौं (हाम्रो खेलकुद) – १३ औं दक्षिण एसियाली खेलकुद (साग) अन्तर्गत महिला भलिबलमा आज (बिहीबार) नेपालले आफ्नो दोस्रो खेलमा स्वर्णको बलियो दावेदार भारतसँग प्रतिस्पर्धा गर्दैछ ।

खेल त्रिपुरेश्वरस्थित राष्ट्रिय खेलुकद परिषद (राखेप) को कभर्डहलमा साँझ ५ बजेपछि शुरु हुनेछ । पहिलो खेलमा बंगलादेशमाथि ३–० को सहज जित पाएको नेपाल आफ्नो दोस्रो खेलमा पनि भारतलाई पराजित गर्ने लक्ष्यमा कोर्टमा उत्रनेछ । नेपाली टोली पछिल्लो ६ खेलमा १ सेट पनि नगुमाइकन अपराजित रहन सफल भएको छ ।

त्यसैले नेपालको अग्निपरीक्षा भारतविरुद्धको खेलमा हुनेछ । यही खेलले नै नेपालको स्वर्णको सम्भावना केलाउनेछ । नेपालले हालसम्म भारतलाई पराजित गर्न सकेको छैन । पछिल्ला ६ खेलमा नेपालले बंगलादेश र माल्दिभ्सलाई समान २–२ पटक तथा किर्गिस्तान र अफगानिस्तानलाई १–१ पटक पराजित गरेका छन् ।

थाइल्यान्डमा प्रशिक्षणमा क्रममा सात अभ्यास खेल खेल्दा ४ मा जित र ३ मा हार बेहोरेको थियो । पछिल्ला खेलमा अपराजित रहेकाले पनि नेपाल घरेलु कोर्टमा घरेलु समर्थकमाझ भारतलाई पराजित गर्ने लक्ष्यमा हुनेछ ।

भारतविरुद्ध ओपन स्पाइकर प्रतिभा माली र सरस्वती चौधरी, मिडल ब्लकर सुनिता खड्का, साफिया पुन, उषा कुमारी विष्ट, हीरा केसी, ब्याकमा रेश्मा भण्डारी, निरुता ठगुन्ना, उषा भण्डारी र लिवेरोमा सलिना श्रेष्ठ रहनेछन् । सेटरमा कप्तान अरुणा शाही नै रहनेछिन् ।

तर, स्वर्णको बलियो दावेदार भारतविरुद्धको खेल नेपालका लागि सहज हुने छैन । सागमा महिला भलिबलमा भारले लगातार स्वर्ण जित्दै आइरहेको छ । नेपाल कास्यभन्दा अघि बढ्न सकेको छैन । दक्षिण एसियामा भारत र श्रीलंका बलियो टोलीको रुपमा रहेको छ ।