काठमाडौं (हाम्रो खेलकुद) – १३औं दक्षिण एसियाली खेलकुद प्रतियोगिता (साग) को दोस्रो दिन आज (सोमबार) विभिन्न १२ खेलको प्रतिस्पर्धा हुँदैछ । सागमा सोमबार तेक्वान्दो, कराते, पुरुष फुटबल, ब्याडमिन्टन, भलिबल, खो खो, महिला क्रिकेट, टेबल टेनिस, टेनिस, गल्फ, ट्रायथलन र उसुको प्रतिस्पर्धा हुनेछ ।

राष्ट्रपति विद्यादेवी भण्डारीले आइतबार साँझ त्रिपुरेश्वरस्थित दशरथ रंगशालामा १३औं सागको औपचारिक उद्घाटन गरेकी थिइन् । सोमबार तेक्वान्दो, कराते, ब्याडमिन्टन र ट्रायथलनमा स्वर्णको छिनोफानो हुनेछ । जसमा ब्याडमिन्टन, महिला क्रिकेट र ट्रायथलन पोखरामा तथा अन्य खेल काठमाडौंमा हुनेछ ।

कराते
साग अन्तर्गत कराते सोमबारबाट सुरु हुनेछ । सातदोबाटोस्थित अन्तर्राष्ट्रिय खेलकुद परिसरमा रहेको नवनिर्मित कराते हलमा हुने खेल बिहान ९ बजेबाट सुरु हुनेछ । सोमबार ५ स्वर्णका लागि प्रतिस्पर्धा हुनेछ । जसमा नेपालका ९ खेलाडीले प्रतिस्पर्धा गर्ने छन् ।

तेक्वान्दो
सागमा नेपालले सर्वाधिक स्वर्णको आशा गरेको तेक्वान्दो सोमबार सुरु हुँदैछ । सातदोबाटोस्थित तेक्वान्दो हलमा खेल बिहान ९ बजेबाट सुरु हुनेछ । तेक्वान्दोमा सोमबार सर्वाधिक १३ स्वर्णका लागि प्रतिस्पर्धा हुनेछ ।

टेबल टेनिस

टेबल टेनिसका खेल सोमबारबाट सुरु हुनेछ । खेल लैनचौरस्थित राष्ट्रिय टेबलटेनिस प्रशिक्षण केन्द्रमा सुरु हुनेछ ।

टेनिस

लन टेनिसको प्रतिस्पर्धा सातदोबाटोस्थित टेनिस कोर्टमा नेपालले महिला तथा पुरुष दुवैतर्फ प्रतिस्पर्धा गर्नेछ । बिहान नेपालले टिम इभेन्टको पुरुष र महिलामा क्वाटरफाइनल खेल खेल्नेछ । पुरुषतर्फ नेपालले बंगलादेशको सामना गर्नेछ भने महिलातर्फ माल्दिभ्सको सामना गर्दैछ ।

उसु
उसुका खेलहरु लगनखेलस्थित आर्मीको कभर्डहलमा हुनेछ ।

गल्फ
साग अन्तर्गत गल्फको प्रतिस्पर्धा गोकर्ण गल्फ क्लबमा हुनेछ ।

पुरुष फुटबल

पुरुष फुटबलमा सोमबार दुई खेल हुनेछ । पहिलो खेलमा बंगलादेश र भुटानबीच दिउँसो १ बजे तथा दोस्रो खेलमा माल्दिभ्स र श्रीलंकाबीचको खेल साँझ ५ बजे हुनेछ । दुवै खेल त्रिपुरेश्वरस्थित दशरथ रंंगशालामा हुनेछ ।

भलिबल 

भलिबलमा सोमबार महिला र पुरुष दुवै स्पर्धामा कास्य पदकका लागि प्रतिस्पर्धा हुनेछ । पुरुषतर्फ बंंगलादेश र श्रीलंका तथा महिलामा श्रीलंका र माल्दिभ्स प्रतिस्पर्धा गर्नेछन् । खेल त्रिपुरेश्वरस्थित कभर्डहलमा २ बजे र ४ बजे हुनेछ ।

खो-खो

खो खोमा दोस्रो दिन पुरुष स्पर्धामा श्रीलंका र बंगलादेश तथा नेपाल र भारतबीच कीर्तिपुरको नयाँ बजारमा प्रतिस्पर्धा हुनेछ । श्रीलंका र बंगलादेश बिहान ९ बजे र नेपाल र भारत बिहान १० बजे प्रतिस्पर्धा गर्नेछन् । महिला स्पर्धामा नेपाल र भारत बिहान ११ बजे र श्रीलंका र बंगलादेश मध्यान्न १२ बजे प्रतिस्पर्धा गर्नेछन् ।

ब्याडमिन्टन

पोखरामा हुने ब्याडमिन्टनतर्फ सोमबार पुरुष टिम इभेन्टस र महिला टिम इभेन्टसको सेमिफाइनल खेल हुँदैछ । नेपालले सेमिफाइनलमा श्रीलंकासंग प्रतिस्पर्धा गर्नेछ । नेपालको लागि पुरुष टिम इभेन्टमा दिपेश धामी, प्रिन्स दाहाल र रत्नजित तामाङले खेल्नेछन् । महिलाटमा रसिला महर्जन, नङ्शलदेवी तामाङ र जेसिका गुरुङले प्रतिस्पर्धा गर्ने छन् । सेमिफाइनलको खेल पोखरा रंगशालाको कभर्ड हलमा बिहान १० बजे सुरु हुनेछ ।

महिला क्रिकेट

पोखरामा हुने महिला क्रिकेटमा नेपालले सोमबार माल्दिभ्सको सामना गर्नेछ । पोखरा रंगशालामा हुने खेल बिहान ११ बजे सुरु हुनेछ । यस खेल नेपाली महिला क्रिकेट टिमका लागि घरेलु मैदानमा पहिलो अन्तराष्ट्रिय खेल समेत हुनेछ । ट्रायथलन
पोखरामा आयोजना हुने ट्रायथलन खेलको प्रतिस्पर्धा सोमबार बिहान हुनेछ । सोमबार ईलाईट स्प्रिन्ट प्रतिस्पर्धामा नेपाल, श्रीलंका र भारतका खेलाडीहरुले प्रतिस्पर्धा गर्ने छन् । पुरुषतर्फ नेपालका नितेश मानन्धर र बशन्त थारु तथा महिलातर्फ सोनी गुरुङ र निर्जला ताम्राकारले प्रतिस्पर्धा गर्ने छन् ।