एजेन्सी – किलियन एमबाप्पेले २ गोल गरेपछि रियल मड्रिडले कोपा डेल रेमा तालाभेरालाई ३-२ जित निकाल्दै अन्तिम १६ मा पुगेको छ।

यो खेलमा २ गोल गरेसँगै एमबाप्पेले सन् २०२५ मा रियलका लागि ५८ गोल पूरा गरेका छन्। उनी अब क्रिस्टियानो रोनाल्डोले २०१३ मा बनाएको ५९ गोलको कीर्तिमान बराबरी गर्न मात्र १ गोल टाढा छन्।

खेलको ४२औँ मिनेटमा एमबाप्पेले पेनाल्टीमार्फत रियललाई अग्रता दिलाए। कर्नरको क्रममा मार्कोस मोरेनोको बल ह्यान्ड भएपछि पेनाल्टी दिइएको थियो।

त्यसको ४ मिनेटपछि एमबाप्पेको प्रहार डिफेन्डर म्यानुअल फरान्डोमा लागेर आत्मघाती गोलमा परिणत भएपछि पहिलो हाफमा रियल २-० ले अघि रह्यो।

८०औँ मिनेटमा नाहुएल अरोयोले गोल फर्काउँदै तालाभेरालाई आशा दिलाए । ८८ औं मिनेटमा एमबाप्पेले टाढाबाट प्रहार गर्दा गोलकिपरको हातबाट चिप्लिँदै गोलमा पुग्दा रियलले खेलमा नियन्त्रण बनायो ।
इन्जुरी समयमा गोन्जालो दी रेन्जोले तालाभेराका लागि अर्को गोल गरे पनि त्यो पर्याप्त भएन।

मुख्य प्रशिक्षक जाबी अलोन्सोले ला लिगामा अलाभेसलाई हराएको टोलखबाट १० खेलाडी परिवर्तन गरेका थिए। जितसँगै पछिल्लो केही हप्ताको दबाबमा रहेको रियलले ५ खेलमा तेस्रो जित दर्ता गरेको छ।

कोपा डेल रेमा अगाडि बढ्नुका साथै रियल ला लिगामा दोस्रो स्थानमा छ । च्याम्पियन्स लिगमा पनि राम्रो अवस्थामा छ।

कोपा डेल रेको बुधवार अन्य खेलका नतिजा