काठमाडौं (हाम्रो खेलकुद) – १३ औं दक्षिण एसियाली खेलकुद प्रतियोगिता (साग) को सातौ दिन आज शनिबार विभिन्न १८ खेलमा प्रतिस्पर्धा हुँदैछ । आजबाट काठमाडौंमा जुडो तथा ३ वाई ३ बास्केटबल शुरु हुदैछ ।

शनिबार आर्चरी, एथ्लेटिक्स, बास्केटबल (३ वाई३), बक्सिङ, क्रिकेट, साइक्लिङ, फेन्सिङ, फुटबल, ह्यान्डबल, जुडो, कबड्डी, स्वीमिङ, सुटिङ, स्क्वास, टेनिस, बिच भलिबल, भारोत्तोलन र कुस्तीमा प्रतिस्पर्धा हुनेछ । महिला क्रिकेट, भारोत्तोलन, बिच भलिबल, आर्चरी र ह्यान्डबल पोखरामा हुन्छ । कुस्ती जनकपुरमा हुनेछ । पदक तालिकामा छैटौ दिनसम्म भारतले ८१ स्वर्णसहित अग्रता बनाएको छ । ४१ स्वर्णसहित नेपालले भारतलाई पछ्याईरहेको छ ।

आर्चरी

पोखरामा हुने आर्चरीतर्फ नेपालसहित भुटान, श्रीलंका र बंगलादेशको सहभागी हुनेछ । अन्तिम समयमा आएर पाकिस्तान भने सहभागी नहुने भएको छ । शुक्रबार र्याङकिङ राउण्ड हुने छ । नेपालले कमजोर शुरुवात गर्दा बंगलादेश अघि रहेको छ । १० स्वर्ण पदकको लागि ५७ जना खेलाडीहरुले प्रतिस्प्रर्धा गर्नेछन् । आर्चरीमा भुटानका ९ जना खेलाडीहरु प्रतियोगितामा सहभागि हुदैछन् । अन्य तीन देशका १६÷१६ जना खेलाडीहरु सहभागि हुने भएका हुन् ।

एथ्लेटिक्स

एथ्लेटिक्सतर्फ अन्तिम दिन आज म्याराथनमा प्रतिस्पर्धा हुनेछ । दशरथ रंगशालामा बिहान ७ बजेबाट सुरु हुने म्याराथनमा नेपालको तर्फबाट पुरुषतर्फ होमलाल श्रेठ, किरणसिंह बोगटी र महिलामा पुष्पा भन्डारी र राजपुरा पछाईले प्रतिस्पर्धा गर्नेछन् ।

बास्केटबल

बास्केटबलमा शनिबार महिला दुई र पुरुषमा तीन खेल हुनेछ ।

बक्सिङ

साग अन्तर्गत बक्सिङमा आज विभिन्न तौल समूहमा प्रतिस्पर्धा हुनेछ ।

क्रिकेट

त्रिवि क्रिकेट मैदान कीर्तिपुरमा पुरुषतर्फ दुई खेल हुनेछन् । पहिलो खेलमा नेपाल र बंगलादेश तथा दोस्रो खेलमा माल्दिभ्स र भुटानबीच खेल हुनेछ । नेपाललाई फाइनल पुग्न बंगलादेशलाई पराजित गर्नैपर्ने हुन्छ । महिलातर्फ पोखरा क्रिकेट मैदानमा तेस्रो स्थानको लागि खेल हुनेछ ।

साइक्लिङ

साइक्लिङ अन्तर्गत अन्तिम दिन शनिबार महिला र पुरुषको व्यक्तिगत रोडरेस हुनछे । प्रतिस्पर्धा रिङरोडा हुनेछ ।

फेन्सिङ

फेन्सिङतर्फ शनिबार तीन स्पर्धामा प्रतिस्पर्धा हुनेछ । नयाँ बजार कीर्तिपुरमा हुने स्पर्धामा मेन्स फोइल इन्डिभिजुअल, वुमन्स साब्री इन्डिभिजुअल र वुमन्स इपी इन्डिभिजुअलमा शुरुवातदेखि स्वर्णका लागि प्रतिस्पर्धा हुनेछ ।

फुटबल 

फुटबलतर्फ शनिबार दुई खेल हुनेछ । त्रिपुरेश्वस्थित दशरथ रंगशालामा दिउँसो १ः३० बजे घरेलु टोली नेपालले माल्दिभ्ससँग खेल्दैछ । यो खेलमा जित हात पारे नेपालको फाइनल पुग्ने सम्भावना बलियो रहनेछ । अपराजित नेपाल ४ अंक जोडेर दोस्रो स्थानमा छ ।
आजै शीर्षस्थानमा रहेको भुटानले श्रीलंकासँग प्रतिस्पर्धा गर्दैछ । खेल साँझ ५ः३० बजे शुरु हुनेछ । भुटानले जित हात पारे फाइनलमा स्थान बनाउनेछ ।

यस्तै महिला तर्फ आज राउन्ड रोविनको अन्तिम दिन दुई खेल हुनेछ । पोखरा रंगशालामा श्रीलंका र माल्दिभ्स बीच पहिलो खेल हुनेछ । भारत र नेपालबीच दोस्रो खेल हुनेछ । नेपाल र भारतले ९ डिसेम्वरमा स्वर्णका लागि खेल्नेछ ।

ह्यान्डबल

ह्याण्डबलमा शनिबार महिला र पुरुष दुवैतर्फ सेमिफाइन्लका खेल हुनेछ ।

जुडो 

पदकको अपेक्षा गरिएको जुडोका खेलहरु आजबाट लगनखेलस्थित आर्मीको कभर्डहलमा हुनेछ । पहिला दिन तौलमात्रै मापन हुनेछ । आइतबारदेखि प्रतिस्पर्धा शुरु हुनेछ ।

कबड्डी

हल्चोकस्थित सशस्त्र प्रहरी बलको मुख्यालयमा कबड्डीतर्फ शनिबार लिग चरणका खेल हुनेछ ।

स्वीमिङ

पौडीको तेस्रो दिन विभिन्न ७ इभेन्टसमा प्रतिस्पर्धा गर्नेछ । सातदोबाटोस्थित स्विमिङ पुलमा महिला ८०० मिटर फ्रिस्टाइल रिले, पुरुष ४०० मिटर इन्डिभिजुल मिडले, पुरुष र महिला १०० मिटर ब्याकस्ट्रोक, महिला र पुरुष ५०० मिटर ब्रेस्ट स्ट्रोक र महिला ५० मिटर फ्रि स्टाइलमा प्रतिस्पर्धा हुनेछ ।

सुटिङ 

सुटिङतर्फ शनिबार दुई स्पर्धामा खेल हुँदैछन् । एयर पेस्ताल महिला र एयर राइफल मिक्स टिमा खेल हुनेछ ।

स्क्वास

शुक्रबारदेखि शुरु भएको स्क्वासमा महिला र पुरुषमा सेमिफाइनलका खेलसातदोबाटोस्थित स्क्वास हलमा हुनेछ ।

टेनिस

टेनिसमा शुक्रबार विभिन्न स्पर्धामा प्रतिस्पर्धा हुनेछ ।

बिच भलिबल

फेवाताल किनारमा जारी बिच भलिबलतर्फ आज पनि समूह चरणका विभिन्न खेलहरु हुनेछन् । शुक्रबार नेपालका चारै टोलीले सफलता हात पारेका थिए ।

भारोत्तोलन

भारोत्तोलनमा शुक्रबार ५ स्पर्धा हुनेछ । पुरुषतर्फ २ तथा महिलाको ३ खेल हुनेछ । पुरुषमा ८९ केजी, र ९६ केजीको प्रतिस्पर्धा हुनेछ । महिलामा ७१, ७६ र ८१ केजीको स्पर्धा हुनेछ ।

कुस्ती

जनकपुरमा जारी कुस्तीमा शनिबार महिला र पुरुषका दुई– दुई खेल हुनेछ ।