काठमाडौं (हाम्रो खेलकुद) – होंगान्जी न्यू डायमन्ड स्पोर्ट्स क्लबको आयोजनामा बुधबारदेखि सुरु हुने होंगान्जी न्यू डायमन्ड खुला महिला भलिबल प्रतियोगितामा ७ टोलीको सहभागिता रहने पक्का भएको छ ।

आयोजक न्यू डायमन्डले आज राजधानीमा पत्रकार सम्मेलन गर्दै प्रतियोगिताको सम्पूर्ण तयारी पूरा भएको जानकारी दिएको हो । प्रशिक्षणले मात्रै भलिबल विकासमा पूर्णता नदेखिने हुनाले स्तरीय प्रतियोगिता गर्ने उद्देश्यसहित न्यु डायमन्ड स्पोर्ट्स क्लबले विगत दुई वर्षदेखि राष्ट्रिय स्तरको यो प्रतियोगिता आयोजना गर्दै आइरहेको छ । यसपटक प्रतियोगिता पुस २३ देखि २६ सम्म नयाँ बसपार्कस्थित ढोरपाटन क्लबको खेल मैदानमा हुँदैछ ।

प्रतियोगितामा ७ टोलीको सहभागिता रहने छ । सहभागी टोलीमा नेपाल एपीएफ क्लब, न्यु डायमन्ड स्पोर्ट्स क्लब, नेपाल पुलिस क्लब, टप्स मावि पोखरा, त्रिभुवन आर्मी क्लब, पारामाउन्ट इंग्लिस बोर्डिङ स्कुल र ढोरपाटन स्पोर्ट्स क्लब रहेका छन् । प्रतियोगिता लिग कम नकआउट पद्दतिमा खेलाइनेछ । प्रतियोगिताको अनुमानित बजेट २६ लाख रुपैयाँ रहेको छ ।

तेस्रो संस्करणको प्रतियोगिताको लागि होंगान्जी बौद्ध समाजले एक वर्षको लागि पुनः प्रायोजन नवीकरण गरेको छ । समाजले मुख्य प्रायोजनबापत पहिलो र दोस्रो पुरस्कार राशी उपलब्ध गराउनेछ । तेस्रो संस्करणको प्रतियोगिताको विजेताले नगद ४ लाख १ सय १ रुपैयासहित सिल्ड, मेडल र प्रमाणपत्र प्राप्त गर्नेछन्। उपविजेताले ३ लाख १ सय १ रुपैयासहित सिल्ड, मेडल र प्रमाणपत्र प्राप्त गर्नेछन् । तेस्रो हुनेले १ लाख ५१ हजार १ सय १ रुपैयासहित सिल्ड, मेडल र प्रमाणपत्र प्राप्त गर्नेछन् । चौथो हुनेले ५१ हजार १ सय १ रुपैयासहित प्रमाणपत्र मात्र प्राप्त गर्नेछ ।

यस्तै प्रतियोगिताको सर्वाेत्कृष्ट खेलाडीले २१ हजार १ सय १ रुपैयाँ प्राप्त गर्नेछिन् । व्यक्तिगत विधातर्फ स्पाइकर, ब्लकर, क्विकर, सेटर, सर्भर, डिफेन्डर र प्रशिक्षकले जनही ७ हजार १ सय १ रुपैयासहित ट्रफी र प्रमाणपत्र प्राप्त गर्नेछन् । पहिलो र दोस्रो पुरस्का मुख्य प्रायोजक होङ्ग्वान्जी बौद्ध समाजले, तेस्रो पुरस्कार मुक्तिनाथ बिकास बैंकले, चौथौ पुरस्कार निलगिरी युथ क्लबले प्रायोजन गर्नेछ ।

यसका साथै ब्ल्याक हर्स सुजले चौथो पुरस्कार बराबरको रकम सहयोग प्रायोजन गरेको छ । उत्कृष्ट खेलाडीको पुरस्कार श्रद्धा फाइनान्स न्युरोडले प्रायोजन गरेको छ । यस्तै चन्द्रागिरी नगरपालिका तथा नगरपालिकाका विभिन्न वडा, राष्ट्रिय खेलकुद परिषद (राखेप), नेपाल भलिबल संघ र विभिन्न सहयोगी दाताहरुले सहयोग गरेका छन् । यसैगरी तपाईं हाम्रो बहुउद्देश्यीय सहकारी संस्थाले पनि २५ हजार रुपैयाँ सहयोग गर्ने भएको छ । चन्द्रागिरी नगरपालिकाको वडा नं १५ ले ३० हजार तथा वडा नं ६ का अध्यक्ष ज्यूले व्यक्तिगत १० हजार र वडाको तर्फबाट १० हजार गरि कुल २० हजार सहयोग गर्ने भएका छन् । साथसाथै चन्द्रागिरी नगरपालिकाले पनि उल्लेख्य सहयोग गर्ने वाचा गरेको कार्यक्रममा जानकारी दिइयो  ।