काठमाडौं (हाम्रो खेलकुद) – नेपाली कांग्रेसको खेलकुद विभागले पहिलो चरणमा १३ औं दक्षिण एसियाली खेलकुद (साग) का स्वर्ण पदक विजेता खेलाडीलाई शुक्रबार नगदसहित सम्मानित गरेको छ ।

पार्टी कार्यलय सानेपामा कार्यक्रमको आयोजना गर्दै कांग्रेस खेलकुद विभागले सागमा स्वर्ण जित्न सफल ८० खेलाडीलाई नगदसहित सम्मानित गरेको हो । सागमा चार स्वर्ण जित्ने जलपरी गौरिकाले सर्वाधिक २५ हजार रुपैया प्राप्त गरिन् । परिवारका साथ लन्डन बस्दै आएकी गौरिका कार्यक्रममा अनुपस्थित थिइनन् ।

यस्तै सागमा दोहोरो स्वर्ण जित्न सफल करातेका मन्डेकाजी श्रेष्ठ, तेक्वान्दोकी आयशा शाक्य र गल्फका सुवास तामाङले समान १५ हजार रुपैयाँ हात पारे । सागमा एक स्वर्ण जित्ने खेलाडीले समान १० हजार रुपैयाँबाट सम्मानित भए । खेलाडीहरुको सम्मानपछि पार्टी सभापति शेर बहादुर देउवाले खेलाडीको भत्ता बढाउन पहल गरिने बताए ।

कांग्रेस खेलकुद विभागका प्रमुख मोहन बहादुर बस्नेतले पहिलो चरणमा स्वर्ण धारीलाई मात्रै सम्मान गरिएको र बाँकी चरणमा रजत, कास्य पदक विजेता र प्रशिक्षकलाई पनि सम्मान गर्दै जाने बताए । उनले प्रशिक्षकहरुको कोरोना बिमा गरिदिने समेत घोषणा गरे । यस्तै संयोजक बस्नेतले नेपाली खेलकुद बिकासको लागि कांग्रेसको सिंगो पार्टी नै लाग्ने बताएका छन् ।

‘तल्लो लेभलबाट देशभरि नै खेलाडी उत्पादन गर्नु छ । त्यसपछि खेलाडीलाई व्यवस्थापन गर्नु छ । प्रशिक्षकको वृद्धि र बिकासमा पनि ध्यान दिनेछौं ’ संयोजक बस्नेतले भने, ‘खेलाडीको प्रोत्साहन भत्ता कटौतीको विषयमा हामीले बुझिरहेका छौं । खेलाडीले जति स्वर्ण जितेका छन् । त्यति नै मात्रामा प्रोत्साहन भत्ताको लागि हामी लड्नेछौं । यस विषयमा नेपाल ओलम्पिक कमिटिको ऐनले नमाने र यस विषयमा झकझक्याइरहने छौं ।

राष्ट्रिय खेलकुद परिषद (राखेप) का सदस्यसचिव रमेश कुमार सिलवालले रकमभन्दा सम्मान ठूलो कुरा रहेको र यसले खेलाडी र प्रशिक्षकको हौसला वृद्धि हुने बताए । उनले खेलकुद उत्पादनमुलक क्षेत्र रहेको पनि बताए । खेलाडीको तर्फबाट सम्वोधन गरेका मन्डेकाजी

श्रेष्ठले सम्मान गरेकोमा खेलकुद विभागलाई धन्यवाद ज्ञापन गर्दै खेलाडीको खेल पछिको भविष्य के हुने त्यसबारे सोचिदिन आग्रह गरे ।
गत वर्ष स्वदेश आयोजना भएको १३ औं सागमा नेपालले एतिहासिक सफलता प्राप्त गर्ने क्रममा ५१ स्वर्ण, ६० रजत र ९७ कास्य सहित २ सय ७ पदक जितेको थियो ।