विजय नेपाली, पोखरा

घरेलु भलिबलका चर्चित क्लबको सहभागितामा टाइगर ग्रुप अफ पोखराले यसै महिनाको अन्त्यमा राष्ट्रिय महिला तथा पुरुष क्लब भलिबल च्याम्पियनसिप आयोजना गर्ने भएको छ ।

माघ २७ गते देखि फागुन १ गते सम्म पोखरा रंगशालाको भलिबल कोर्टमा च्याम्पियनसिप सञ्चालन हुने सोमबार आयोजित पत्रकार सम्मेलनमा प्रतियोगितामा आयोजक संस्थाका अध्यक्ष नारायण प्रसाद शर्माले बताए ।

राउन्ड रोविनका आधारमा हुने प्रतियोगितामा महिलातर्फ ४ र पुरुष तर्फ ४ टोलीको सहभागिता रहने बताइएको छ । तीन विभागिय टोली त्रिभुवन आर्मी फुटबल क्लब, नेपाल पुलिस क्लब र नेपाल एपिएफ क्लबले दुवैतर्फ प्रतिस्पर्धा गर्नेछन् । त्यस्तै महिलातर्फ न्यू डायमण्ड क्लब र पुरुषतर्फ भने गण्डकी प्रदेश चौथो टोलीका रुपमा रहनेछन् ।

राउन्ड रोविनपछि समूहका शीर्ष २ टोलीले फाइनल खेल्नेछन् । प्रतियोगिताको दुवै तर्फको विजेताले समान एक लाख ५० हजार, दोस्रो हुने टोलीले ७५ हजार तथा तेस्रोले ३५ र चौथो टोलीले १५ हजार रुपैयाँ रुपैयाँ प्राप्त गर्नेछन् ।

त्यस्तै प्रतियोगिताको सर्वोत्कृष्ट खेलाडीलले खेलाडीले २० हजार तथा विधागत उत्कृष्ट सर्भर, सेटर , ब्लकर , डिफेन्डर र स्पाइकरले समान ५ हजार रुपैयाँ प्राप्त गर्नेछन् । हाम्रो खेलकुद डट कमले प्रतियोगिताको प्रत्यक्ष प्रसारण गर्नेछ ।

नेपाल भलिबल संघको समन्वय रहने प्रतियोगिताको व्यवस्थापन पश्चिमाञ्चल भलिबल संघले, संयोजन राष्ट्रिय खेलकुद परिषद्ले गरेको छ । पोखरा नगरपालिका विशेष सहयोगी रहने प्रतियोगितालाई सफल दुध सहयोगीका रुपमा रहने बताइएको छ ।