एजेन्सी – विश्व खेलकुदको कुम्भमेला ३२औं गृष्मकालीन ओलम्पिक ‘टोकियो ओलम्पिक २०२०’ को अन्तिम दिन अमेरिकाले ३ स्वर्ण थप्दै शीर्षस्थानमा ओलम्पिक सकाएको छ । सुरुवाती दिनदेखि नै अधिकांश समय दोस्रो स्थानमा रहेको अमेरिकाले अन्तिम दिन ३ स्वर्ण थपेपछि ओलम्पिकको सुरुवाती दिनदेखि नै अग्रतस्थानमा रहेको चीनलाई पछि पार्दै शीर्ष स्थानमा ओलम्पिक टुंग्याएको हो ।

ओलम्पिकको अन्तिम दिन सबै ३ सय ४० स्वर्ण ३३८ रजत र ४०२ कास्यगरी १०८० पदकको छिनोफानो भएको छ । ओलम्पिकमा २०५ राष्ट्र र शरणार्थी टोलीका ११ हजार ९० एथलिटले ३३ खेलमा विभिन्न ३३९ इभेन्ट्समा प्रतिस्पर्धा गरेका थिए । नेपालसहित ११२ राष्ट्र पदकविहीन बने । टोकियो ओलम्पिकको अन्तिम दिन अमेरिकाले पदक तालिकामा अग्रता बनाएको छ । चीनलाई पछि पार्दै अमेरिकाले लगातार तेस्रो पटक शीर्ष स्थान ओगटेको हो । सन् २०१२ को लन्डन ओलम्पिक र २०१६ को रियो ओलम्पिकमा पनि अमेरिका शीर्ष स्थानमा रहेको थियो ।

अमेरिकाले ३९ स्वर्ण, ४१ रजत र ३३ कास्यगरी कुल ११३ पदक जित्न सफल भयो । चीनले अन्तिम दिन स्वर्ण जित्न नसकेपछि दोस्रो स्थानमा चिक्त बुझाउन बाध्य बन्यो । चीनले ३८ स्वर्ण, ३२ रजत र १८ कास्यगरी ८८ पदक जित्न सफल भयो । आयोजक जापान २७, स्वर्ण १४ रजत र १७ कास्यगरी कुल ५८ पदक जित्दै तेस्रो स्थानमा रह्यो ।

बेलायत २२ स्वर्ण २१ रजत र २२ कास्य गरी ६५ पदक जित्दै चौथो स्थानमा रह्यो । रसियन ओलम्पिक कमिटि टोली (आरओसी) २० स्वर्ण, २८ रजत र २३ कास्यसहित ७१ पदक जित्दै शीर्ष पाँचमा रह्यो । १७ स्वर्ण, ७ रजत र २२ कास्यगरी कुल ४६ पदक जितेर अष्ट्रेलिया छैटौ स्थानमा रह्यो । नेदरल्यान्ड्स १० स्वर्ण, १२ रजत र १४ कास्यगरी ३६ पदक जित्दै सातौ स्थानमा रहँदा फ्रान्स १० स्वर्ण, १२ रजत र ११ कास्यसहित ३३ पदक जितेर आठौं स्थानमा रह्यो ।

जर्मनी १० स्वर्ण, ११ रजत र १६ कास्यगरी ३७ पदकसहित शीर्ष नवौं स्थानमा रह्यो । १० स्वर्ण, १० रजत र २० कास्यगरी ४० पदक जित्दै इटाली शीर्ष १० मा रह्यो । क्यानडाले ७ स्वर्ण, ६ रजत र ११ कास्यगरी २४ पदक हात पार्यो । ब्राजिल ७ स्वर्ण, ६ रजत र ८ कास्यगरी कुल २१ दिक जित्दै १२औं स्थानमा रह्यो । न्युजिल्यान्डले ७ स्वर्ण, ६ रजत र ७ कास्यगरी २० पदक जित्यो । क्युवाले ७ स्वर्ण, ३ रजत र ५ कास्यगरी १५ पदक जित्दै १४औं स्थानमा रह्यो । हंगेरीले ६ स्वर्ण, ७ रजत र ७ कास्यगरी २० पदक जित्यो ।

दक्षिण कोरिया ६ स्वर्ण ४ रजत र १० कास्यगरी कुल २० पदकसहित १५औं स्थानमा रह्यो । पोल्यान्डले ४ स्वर्ण, ५ रजत र ५ कास्यगरी १४ पदक जित्यो । चेक रिपब्लिकले ४ स्वर्ण, ४ रजत र ३ कास्यगरी ११ पदक जितेको छ । केन्याले ४ स्वर्ण, ४ रजत र २ कास्यगरी १० पदक जित्यो । नर्वेले ४ स्वर्ण, २ रजत र २ कास्य गरी ८ पदक जित्दै शीर्ष २० मा रह्यो । जमैकाले ४ स्वर्ण, १ रजत र ४ कास्य गरी ९ पदक जित्यो ।

स्पेन, स्वीडेन, स्वीट्जरल्यान्ड, डेनमार्क, क्रोएसिया, इरान, सर्विया बेल्जियम, बुल्गेरिया, स्लोभेनिया र उज्वेकिस्तान गरी ११ राष्ट्रले समान ३–३ स्वर्ण जित्न सफल भयो । जर्जिया, चाइनिज ताइपेइ, टर्की, ग्रीस, युगान्डा, इक्वेडर, आयरल्यान्ड, इजरायल, कतार, बहमास र कोसोभो गरी ११ राष्ट्रले समान २–२ स्वर्ण जित्न सफल भयो ।

युक्रेन, बेलारुस, रोमानिया, भेनेजुएला, भारत, हङकङ, फिलिपिन्स, स्लोभाकिया, दक्षिण अफ्रिका, अष्ट्रिया, इजिप्ट, इन्डोनेसिया, इथियोपिया, पोर्चुगल, ट्युनिसिया, इस्टोनिया, फिजि, लात्भिया, थाइल्यान्ड, बर्मुडा, मोरोक्को, प्युरेटो रिको गरी २२ राष्ट्रले समान १–१ स्वर्ण जित्न सफल भयो । यस्तै जमैकाले महिला १ सय मिटरमा तथा स्विट्जरल्यान्डले साइक्लिङको वुमन्स क्रस कन्ट्री माउन्टेन बाइकमा पोडीएम नै स्विप गरे ।

यसपटकको ओलम्पिकमा कतार, बर्मुडा र फिलिपिन्सले इतिहासकै पहिलो स्वर्ण पदक जिते । त्यस्तै बर्किना फासो, सान मारिनो र तुर्कमेनिस्तानले ओलम्पिकको पहिलो पदक जिते । यसपटक जापानले सफ्टबल, कराते, स्पोर्ट क्लाइम्बिङ, सर्फिङ र स्केटबोर्डिङ समावेश गरेको थियो । यस्तै विभिन्न खेलको मिक्स टिम इभेन्टले पनि ओलम्पिकमा पुनरागमन गरेको थियो ।

टोकियो ओलम्पिकमा २०५ राष्ट्र र शरणार्थी टोलीमध्ये हालसम्म ६५ राष्ट्रले स्वर्ण जित्दा ९३ राष्ट्रले पदक जित्न सफल भए । ओलम्पिक जापानको टोकियो शहरका २३ जुलाईदेखि ८ अगस्टसम्म भएको थियो । ३३औं संस्करणको ओलम्पिक सन् २०२४ मा फ्रान्सको पेरिसमा हुनेछ ।