काठमाडौं (हाम्रो खेलकुद) – त्रिभुवन आर्मी क्लबका ८ बक्सरले रुसको मस्कोमा हुने ५८ अ‍ौं विश्व मिलिटरी बक्सिङ च्याम्पियनसिपमा प्रतिस्पर्धा गर्ने भएका छन् ।

आर्मीले सोमबार एक कार्यक्रममाझ सहभागी खेलाडी तथा अफिसियललाई बिदाई तथा शुभकामना व्यक्त गरेको छ । प्रधानसेनापति प्रभुराम शर्माले शुभकामना सन्देशसहित पदक जित्ने विश्वास रहेको बताए । उनले खेलाडीले अनुभव बटुल्ने सँगै भविष्यमा पनि यस्ता प्रतियोगिताले खेलाडीको स्तरोन्नतिमा सहयोग पुग्ने विश्वास व्यक्त गरे ।

यसै भदौ ३१ देखि असोज १० सम्म हुने प्रतियोगितामा समान ४-४ महिला र पुरुष बक्सरले प्रतिस्पर्धा गर्नेछन् । पुरुषतर्फ आशिष दवाडी, दानबहादुर दर्लामी, प्रेम चौधरी र १३ अ‍ौं सागका पदकधारी सुशील थापामगरले सहभागिता जनाउने छन् । महिलातर्फ १३ अ‍ौं सागकी स्वर्णधारी मिनु गुरुङसँगै विमला श्रेष्ठ, पुनम रावल र चन्द्रकला थापाले खेल्नेछन् ।

टोलीको सेफ द मिसनमा उपरथी निरन्जन कुमार श्रेष्ठ तथा कप्तानमा उज्वल केसी छन् । प्रशिक्षकमा विशाल शम्शेर थापा, देवेन्द्र राज सिंह ठकुरी र उमेश लामा रहेका छन् । ताराराम श्रेष्ठ रेफ्री तथा श्याम खड्का स्वास्थ्य टोलीका सदस्यका रुपमा रहनेछन् ।

नेपाली सेना २०७५ सालदेखि विश्व मिलिटरी खेलकुद परिषद (सिआइएसएम) को सदस्य रहँदै आएको छ । आर्मीले यसअघि सन् २०१९ मा सातौं विश्व सिआइएसएम खेलकुदमा पनि प्रतिस्पर्धा गरेको थियो । त्यसबेला बक्सिङ खेलाडीेले पाचौं स्थानसम्म हासिल गरेका थिए ।